Charmed is een Amerikoansje televisjeserie van de zender The WB (in Belhië uutgezonden up KanaalTwee) die acht joar lange wier uutgezond'n. In 'Charmed' zit er e bitje sciecenfiction, komedie, fantasy, horror en zelfs e bitje soap. In 1998 wier den eeste episode (Someting Wicca This Way Comes) uutgezond'n in de Verènigde Stoaten. No die pilootaflevering keken der mo liefst 7,7 miljoen mesjn. Domee is da lange tyd de best bekek'n pilootafleverynge van The WB gewist, toet da de 'Smalville'-piloot uutgezond'n wier. Et wier geproduced deur Aaron Spelling en bedacht deur Constance M. Burge, en tgoat over drie zusters die de sterkste goeie heks'n zyn van da weireld, in de magische weireld bekend ols de 'Charmed Ones' (de Betoverd'n, de Beschermd'n,...), mo iedere anders kent under ols de Halliwell-zusjes, gespeeld deur Shannen Doherty, Holly Marie Combs, Alyssa Milano en loater deur Rose McGowan. Iedere zuster et eur eig'n magische krachtn, die groei'n en verander'n met verloop van tyd. De zusters weunen tôpe in een uus en gebruik'n under bovennateurleke gaves voe te vechtn met eksenmeesters, demonen en andere slichte krachtn die weunen in San Francisco, Calyfornië.

't Logo van Charmed

De slagzinne van de show is 'The Power of Three will set us free', wa da ook op de verhollienne sloat. Et bekendste logo da gebruukt wier is het Triquetra, een oorsprounkelijk Keltiesch tèken met drie schakels, da loter ook deur de Christenen wier gebruikt voe de drie-eenheid voor te stell'n. Toen da de show begost kwaamt er ton ook kritiek uut die noek dat het Triquetra nu ook gebruukt wier voe heksn voren te stell'n.

Et begun bewerkn

Up e stormachtige nacht in 't joar 1998 keert Phoebe Halliwell were no 't huus da ze in opgroeide in San Francisco. Zet een endje in New York geweund, omda ze eur pa probeerde te zoek'n. Een olf joar dovoor'n is under grootmoeder die under upgevoed et gestorvn an e hartaanval in et huus in San Francisco, da eur drie klèindochters, Prudence 'Prue', Piper en Phoebe ton geërfd en.

Phoebe en Prue kom'n nie echt overèèn. Ze woren nog zo joung toen da under ma stierf, da Prue assan verantwoord'lek geweest is. Ze kost er ton ook nie teg'n da Phoebe assan losbandig en wild was. Prue is ton ook nie content da eur joungste zusje were keert no San Francisco. Mo dien afkeer is meer gebaseerd up e misverstand: Prue eur ex-verloofde Roger et assan bewèèrt dat Phoebe an em gezetn et, beest da Phoebe assan bluv'n beweren is van nie.

Piper probeert lik assan voe te bemiddel'n, mo de sfeer in et uus is nie denderend den avound da Phoebe thuus komt. Piper zelve is oundertusjn verloofd met Jeremy, da ze leren kennen et in et ziekenhuus toen da eur oma doa laag.

Toen da Prue et huus ant opruum'n was et ze een oed geestenbord van under gevound'n, mo de deure van de zolder, woa da ze als kiend nie binn'n mochten, krieg'n ze nie open. Wannèèr da Phoebe den avound van eur thuuskomst e bitje met da geestenbord speelt, begint et in ene ki letter per letter et woord attic (zolder) te spell'n. Piper en Prue gelov'n eur nie, mo Phoebe is serieus en is dervan overtuugd dat er etwa in da huus ant gebeur'n is. Ton volt de stroom uut.

Phoebe is nieuwsgierig en goat no de zolder, woa da ze noois up mocht. De deure got op'n, en Phoebe ziet een oede rommelzold'r. Ze kiekt e bitje round en ziet een oed boek. Op de voorkant stoat er e triquetra. Zounder derbie noa te peisn kiekt Phoebe in 't boek, en ze leest et gedicht up den eeste pogina.

Domee ountketent Phoebe de magische krachtn dat de zusjes assan al get en. In 't begin reager'n Prue en Piper mo sceptisch, toet dat er uutendelijk toch rore diengen gebeur'n...

Cast bewerkn

Int begin woren de drie hoofdrolspeelsters:

  • Shannen Doherty (bekend van 'Beverly Hills 90210') als Prue, den oedste zuster.
  • Holly Marie Coms (bekend van 'Picket Fences' en goeie vryndinne van Shannen) als Piper, de middelste zuster.
  • Alyssa Milano (bekend van 'Who's the Boss?') als Phoebe, de joungste zuster, ook al was die rolle in et begin weggeleid voe Lori Rom, wien da achter de opnames van den eeste piloot die noois uutgezond'n is gewist ofgezeit et.

Ook al woren Alyssa Milano en Shannen Doherty de bekendste van alle drieje, mo Holly Marie Combs is et meeste geprezen gewist voe eur werk in 'Charmed' en et ook vele pryzen in ountvangst meugen nemen voe eur prestotsjes. Combs en Milano en trouwens ook een ende producers gewist van de serie. Achter et derde seizoen wier Shannen Doherty ountslagen deur de makers van de show; volgens de geruchten aad et met e ruuzje met Alyssa Milano te maken, mo tzien ook geruchten da ze der niemi tegen kosten da ze assan te loate op de set aankwam. Shannen zelve et assan beweerd da ze ountslag pakte omda ze et niemi zaag zitten voe "te werken met mesjn die assan mo klagen over under job en zeggen oe slicht dat wel nie is". Shannen bleef wel e vast inkom'n krygen van de show. Ze zegt da ze noois gin episode mi gezien et sinds da ze niemi meespeelde.

In 't vierde seizoen wierd de Power of Three hersteld achter de dood van Prue deur de komst van under olfzusje Paige Matthews, gespeeld deur Rose McGowan, bekend van eur rolle in o.a. Scream en ex-verloofde van Marilyn Manson.

Leo Wyatt, gespeelt deur Brian Krause, is de white lighter (lichtgids, witte lichter) van de zusjes, mo in 't begin peisn ze da em under klusjesman is. Ondanks alle regeltjes kriegt em e relotje met Piper. Ze trouwen en krieg'n 2 zeuntjes in 'Charmed'. In de latste afleverynge zieje da ze nog e dochtertje krieg'n ook.

Sinds et eeste seizoen, toet en met et zevende speelt Dorian Gregory Darryl Morris, een agent die weet da de zusjes magisch zyn en under soms eki elpt. In seizoen 1 aat em e partner, Andy Trudeau, gespeelt deur Ted King. Em was e jeugdliefde van Prue, die e bitje voordatn stierf voe de zusjes te redd'n, ountdekte wa da de zusjes under geheim is.

Drew Fuller speelde in 't zesde seizoen e white lighter uut de toekomst, Christopher 'Chris' Halliwell, al stelde em zezelvn voren als Chris Perry.. Em kwaam voe mysterieuze redenen en deed e bitje ror, mo et bleek datn eigenlik de tweede zeune van Piper en Leo was, die kwaam voe te voorkom'n da ze broere Wyatt heerser van et kwoad gieng word'n. Roend de tyd dat de kleine Chris geborn word, got de Chris uut de toekomst dood. Wel komtn nog e poar kis voren in de serie, zoals in de allerlatste afleveryng.