Death is e deathmetalband uut Orlando in de Verênigde Stoatn en die upericht is deur Chuck Schuldiner. Z'en bestoan van 1983 (toune nog Mantas) toet 2001 (de latste joarn eigentlik ounder de noame Control Denied). Ze zyn olgemêen anzien lik de uutvinders van 't genre Death Metal.

Chuck Schuldiner, 'n uprichter van Death, in 1992.

Ountstoan bewerkn

1983-1987: van d'êeste demo's toet Scream Bloody Gore bewerkn

Death is deur Chuck Schuldiner, tope me Barney Lee en Frederick DeLillo, upericht in 1983, ounder de noame Mantas. Nunder noame veraarde ol zêre in Death en in 1984 brochtn ze Death by Metal uut, nundern êestn demo. In de metalweireld van Florida kwaamn ze ezô indeliks zêre stief ekend. Ze brochtn tope nog twêe demo's uut, Reign of Terror en Infernal Death. Doarachter dei Schuldiner vors zounder Lee en DeLillo. Achter e bitje zoekn en doen (e is oundermêer êentige weekn byn Slaughter uut Canada ewist), vound 'n me Chris Reifert uut San Francisco eindelik etwien woamei dat 'n echt vors kuste.

't Deurde toune toet 1987 vôorn dat 'n tope me Reifert eindelik en echte ploate kuste uutbriengn. Z'an nog e demo emakt, Mutilation en doadeure kustn ze e contract krygn byn Combat Records, woadeure dan ze Scream Bloody Gore kustn moakn. 't Wos e ploate die indeliks brutoal en primitief kloenk. Z'et nog ossan 'n stempel van pioniersploate in 't genre. Achter die ploate wos Reifert oek nemi wel enoeg en Schuldiner kêerde were no Florida voun were tope te werkn me Frederick DeLillo en twêe andere groepsleedn van Massacre.

1988-1992: van Leprosy toet Human bewerkn

In 1988 brochtn ze Leprosy uut, e ploate die van meziek stief trok up 'n dien dervôorn. 't Wos mo me nunder derde ploate Spiritual Healing dan ze begustn veraarn nor e geluud en genra die nunder zo kenmerknd makte (van indeliks brutoal no vele technischer en melodieuzer).

In 1990 giengn zo oek tourn in Europa, mor up 't latste gat wulde Schuldiner nie anzettn omdat 'n vound dat 'n tour nie goed organiseerd wos. D'aar groepsleedn wuldn doa nie van weetn en ze giengn egliek nor Europa (doavôorn an ze nog zêre 2 gastmuzikantn ezocht). Schuldiner kuste der nie mei lachn en ne dei ze e preces an, woarachter dan ze uut 'n groep ewupt woarn.

't Wos van toune vors da Schuldiner ollêne nog me gastmuzikantn wulde speeln en voun de derde ploate Human uut 1991 oalde 'n Steve DiGiorgio binn, tope me twêe muzikantn van 'n undergroundgroup Cynic (Sean Reinert en Paul Masdival). Human wos nog technischer en melodieuzer dan Spiritual Healing en ne verkochte oek beter dan ol dedie van dervôorn. Me Lack of Comprehension brochtn ze oek nundern êestn clip uut, die nu en toune ekir up MTV espeeld wos. DiGiorgio kuste nie mei up 'n weireldtournee omdat 'n nie weg kuste deur zyn eign group Sadus en doadeure moest Schuldiner were zoekn achter e nieuwn bassist, dat 'n vound me Skott Carino.

1993-2001: van Individual Thought Patterns toet an 't ende bewerkn

In 1993 brocht Schuldiner Individual Thought Patterns uut met Gene Hoglan van Dark Angel en Andy LaRocque van King Diamond. 'n Dien latstn kuste nie mei gon tourn omdat 'n verplichtiengn adde me King Diamond en ne wos vervangn deur Ralph Santolla (loater byn Deicide, Obituary en Iced Earth). In 1994 kwam Death zest vôorn in en ofleverienge van Beavis and Butthead, 't bewys van nunder bekendeid.

In 1995 brocht 'n Symbolic uut, numer 7 up de ranglyste van beste extreme metalploatn voogns Metal-Rules.com. 't Gienk nermoal de latste ploate zyn die deur Death uutebrocht wos, Schuldiner wos met e nieuwn groep begunn: Control Denied. E dei dadde omdat 'n me Death nie mir en kuste experimenteern omdan de fans te vele 't zeste wuldn. Met e nieuwn groep vound 'n dat dadde wel kuste. Deur 't countract me Nuclear Blast brochte Death egliek nog e ploate uut, The Sound of Perseverance, me numer die eigentlik moestn dienn voun Control Denied.

Uutendelik et Death bestoan toet in 2001, 't joar woarin da Schuldiner e creveerd is deur ersnstamkanker, woateegn dat 'n ol twi joar an 't vichtn wos. De live-CD's uut 2001 zyn uutebrocht voun geld te vergoarn voun ze chemo en operoaschn te kunn betoaln.

Ploatn en demo's bewerkn

Demos bewerkn

  • Death by Metal 1983 (Mantas)
  • Live in Tampa 1984
  • Reign of Terror 1984
  • Live at Ruby's Pub 1984 (live)
  • Infernal Death 1985
  • Rigor Mortis 1985
  • Back from the Dead 1985
  • Infernal Live 1985
  • Mutilation 1986

Albums bewerkn

  • Scream Bloody Gore 1987
  • Leprosy 1988
  • Spiritual Healing 1990
  • Human 1991
  • The Best of Death 1992
  • Individual Thought Patterns 1993
  • Symbolic 1995
  • The Sound of Perseverance 1998
  • Live in L.A. (Death & Raw) 2001
  • Live in Eindhoven 2001

Externe koppelienge bewerkn