Leopold II van België
Leopold II (Nederlands: Leopold Lodewijk Filips Maria Victor, Frans: Léopold Louis Philippe Marie Victor) (Brussel, 9 april 1835 - Loakn, 17 december 1909) was de twèede keunienk van België van 1865 toet 1909.
Je was de twèede, moar oudstn overleevnde zeune van Leopold I van België en Louise Marie van Orléans. Je volgde de 17stn december 1865 zyn voader ip en je regeerde 44 joar lank toet an zyn dôod. Je stierf zoender wettige zeuns noa te loatn en je wierd ipgevolgd deur Albert I, de zeune van zyn broere, prins Filips.
Trouw bewerkn
Leopold zyn trouw wierd g'arrangeerd ost 'n 18 joar oud was. Je trouwde den 22stn ogustus 1853 in Brussel met eirtshertoginne Marie Henriëtte van Ôostnryk. Ze was de klêendochter van keizer Leopold II. Ze krêegn vier joengers:
- Louise (1858-1924)
- Leopold (1859-1869), trôonipvolger, moa je stierf an zyn neegn joar
- Stefanie (1864-1945)
- Clementine (1872-1952)
Keunienk-Bouwhêre bewerkn
Leopold gaf ipdracht toet den bouw van e grôot dêel gebouwn, stadsprojectn en oopnboare werkn, surtout in Brussel, Ostende en Antwerpn, woaroender de Wellingtonhippodrome, de Keunienklike Galeriën, de Sint-Petrus-en-Pauluskerke en 't Maria Hendrikapark in Ostende; 't Keunienklik Museum vo Middn-Afrika mè 't park in Tervuren; 't Jubelpark met de triomfboge en 't complex, 't Dudenpark in Brussel en de stoasje Antwerpn-Centroal. Deur al die projectn wierd 'n de Keunienk-Bouwhêre (le Roi-Bâtisseur in 't Frans) genoemd.
-
Triomfboge van 't Jubelpark in Brussel -
Keunienklike Galeriën in Ostende -
Sint-Petrus-en-Pauluskerke in Ostende
Congo bewerkn
Leopold was van 1885 toet 1908 den iprichter en ênigstn eignoare van Congo-Vrystoat, hem toegezeid deur de Kolonioale Conferensje van Berlyn. Je regeerde 't land met hulpe van de Force Publique, e kolonioal leger. Zelve ist 'n nôois ter platse gewist. Je verdiënde e fortune uut 't groendgebiëd, êest met ivoor en doarachter mè rubber deur dwangarbeid van d' inheemsche bevolkienge. Ten tyde van zyn keuniengschap zyn der vele gruweldoadn gepleegd, woaroender dwangarbeid, martelienge, môord, oentvoerienge en ofkappn van handn os 't rubberquotum nie g'hoald wierd.
In 1908 brochten de vele negatieve berichtn, oender druk van internationale groepn, de Belgische regerienge dertoe 't bestier van Congo over te pakkn van Leopold in 't vôorlatste joar van zyn bewiend. De Congo-Vrystoat kwam Belgisch Congo.
|
Mêer ofbeeldiengn die ier by passn ku je vien ip Leopold II of Belgium ip Wikimedia Commons. |