Alcazaba

Alcazaba (van 't Aroabisch قصبة "al-qasbah", citadelle) es de noame vo Moorsche verdedigiengsfortn die je typisch in Andalusië, in 't zuudn van Spanje, kut werevindn.

Alcazaba van Malaga

Functie

Berbers en Arabiern ein 't zuudn van Spanje van d'achtste eeuwe tot an 't ende van de vichtienste eeuwe bezet goudn.

Vo under steejn te verdedign, bouwden ze alcazaba's. Da zyn indrukwekkende uutgestrekte burchtn of verdedigiengspaleizn die z'up en ogte anbrochtn. Alcazaba's vind j'in:

• Almeria
• Antequera
• Granada
• Malaga

Ol die alcazaba's dateern van de taifa-keunienkrykn uut de elfste eeuwe.
Alcazaba's zyn meestol gebouwd up of teegn restantn van Romeinse gebouwn.

Kenmerkn

Hoefyzerboogn in twee kleurn

Zo zwoar en indrukwekkend lik dan ze van buutn d'r uut ziene, zo licht, luchtig en fris zyn ze van binn. D'Arabiern woarn doa meesters in.

Alcazaba's vertoonn dudelik erkenboare Aroabische elementn:

• massieve, rechtoekige verdedigiengstoorns
• patio's met fonteinn en vyvertjes
• uutgebreid gebruuk van gebeeldouwde versieriengn (stucwerk)
• gebruuk van woaierboogn en hoefyzerboogn, soms voorziene van e typische omlystienge (alfiz)
• gestileerde plantmotievn (atauriques)

Schoon angeleide patio

Spitsboog en hoefyzerboog mei alfiz

Licteure

• De Groene Gids: Andalusië, Michelin, Uitgeverij Lannoo, nv, Tielt, 2007. ISBN 978-90-209-6843-9.

Referensjn

Ofbeeldiengn die ier by passn ku je vien in de categorie Alcazabas van Wikimedia Commons.