Hoofdmenu openen

Alfons Mervillie (Wontergem, 17 meie 1856 - Kortryk, 4 april 1942) was e West-Vlamsche paster, componist, dichter, publicist en dirigent.

Leevn en werkBewerken

Alfons Mervillie kwam uut e boeremenoage mè zestien jounges. Je gieng noa 't Klêen Seminoarie in Roeseloare, woa dat 'n lesse krêeg van Hugo Verriest en van Gezellecomponist en tekstschryver van 't Klokke-Roelandlied Johan De Stoop, die zyn muzikoal talent ountdekte en die hem hulporganist en kôorleider maktege. Achter zyn ipleidienge an 't Klêen Seminoarie volgde Mervillie nog e cursus filosofie van één joar in Roeseloare, vo dat 'n zyn theologische vormienge an 't Grôot Seminoarie van Brugge begost. In 1882 ist 'n tout paster gewyd.

Oundertusschn was Mervillie, in 't joar 1880, angesteld ols lêroare orgel en kerkzang in de normaalschole van Tourhout. Doa krêegt 'n de bynoame Bach Mervillie. Je was den êestn die gedichtn van Guido Gezelle ip muziek zettege. Je componeerde 290 orgelwerkn, 50 kôorwerkn en liederen, woavan de gekendste het Duinelied "Leve De Panne" (1878), het Kerstlied "Duizende Sterren Versieren den Hemel" (1879), Gusten (1891) en het oegstlied "Het Laatste van de Oegst is binnen" (1902).

Je schrêef ook artikels (surtout gedichtn) vo Vlamsche tydschriftn lik Rond den Heerd, Duinengalm en Biekorf. Ols dichter wierd Mervillie surtout bekend met de vertoalienge van 't gedicht Evangeline van Henry Longfellow, een Amerikoanschn dichter die styf populair was by de Vlamsche dichters in dien tyd. Guido Gezelle vertoaldege ook één van zyn gedichtn, The Song of Hiawatha.

In 1891 was Alfons Mervillie ounderpaster in Dizzêle (Dudzeele), in 1895 in Nieuwpoort en in 1898 in Erdryke (Aertrycke), woa dat 'n de Sint-Ceciliafanfare ipgericht het. In 1913 wast 'n paster in Nieuwkapelle tout an zyn pensioen in 1933. Achter den oorloge krêegt 'n der nog twêe parochies by, Sint-Jacobskapelle en Oudekapelle.

Gheel z'n leeven wos 'n èn gepassionneerde biemelker en schreeft er artikels over in Biekorf, "'t Een en 't ander over de bietjes".

't DuneliedBewerken

't Duinelied "Leve De Panne, daar staat mijn huis" is e lied da styf gekend is an de kust. In 1878 was De Panne e gehucht van Adinkerke. De bevolkienge leefde in schoamele visschershuzetjes en der was nog gin sproake van tourisme. Moa der was e klôoster van nunn uut Veurne met e visschersschooltje woa dat er mêer of 300 jounges lesse krêegn. Alfons Mervillie, de broere van Zuster Jozefien was ip da moment seminarist in Brugge. Je makteg' e gedicht vo zyn zuster, 't Duinelied. 't Lied wierd dêel van de Vlamsche liederkrans en angelêerd langs hêel de kust en loater ook in Tourhout woa da Mervillie lesse gaf.

VariaBewerken

  • Zundag 18 juni 2006 is 't 150e geboortejoar van Alfons Mervillie gevierd in De Panne. Der is e beeld en e pling mè zyn noame ing'huldigd.