Ambrosius Benson

Ambrosius Benson (of Ambrogio Benzone) (Lombardeye, ca. 1495 - Brugge, 1550) was een Italioans kunstschilder die hem in vanof 1518 in Brugge gevestigd hèt, en doa vôr een tydje werktigde in 't atelier van Gerard David.

Maria Magdalena leest

De rust binst de vlucht noar Egypte

Italioanse schilder in Brugge

Gebôorn in Lombardeye (Milano?) as Ambrogio Benzone hèt j' hem in 1518 in Brugge gevestigd woadat je Brugs burgerschap kreeg, en in 1519 wierd je toegeloatn toet de gilde van schilders en de zoadelmoakers as een vrymêester, met 't commentoar dat je "van Lombardeye" was.

Meugeliks was tje angetrokkn deur de commerciêle en artistieke reputoasje van Brugge, van in 1518 werktigde tjie in 't atelier van Gerard David, moa vanof 't moment dat je een vrymêester was zette tjie zyn eign atelier up. T' hope mè Gerard David wordt Ambrosius Benson as êen van de belangrykste vertegenwôordigers van de Brugsche schilderkunste gezien. J' haa vôrol succes met 't schildern van portrettn en godsdienstige taferêeln.

Benson trouwde een êeste kê mè Anna Ghyselin van wien dat je twê zeuns haad, Willem Benson (+1574) en Jan Benson (gestorvn vôor 1581). Je trouwde een twidde kê mè Josyne Michiels, van wien dat je een dochter haad. Neffest zyn twê zeuns wordn Joachim Spaers en Jacob Vinson ook as lêerliengn van hem genoemd.

Werkn

In 't Groeningemuseum in Brugge zyn der verschillende schilderyn van hem bewoard: o.a. Maria mè Kind, De rust binst de vlucht noar Egypte, een Triptiek mè Maria en Kind, de Hillige Maria Magdalena en 't portret van Otto Stochoven. Andere werkn van hem zyn o.a. De Bewênienge van Christus (Brugge), Triptiek met den hillign Antonius van Padua (Brussel, Koninklijke Musea voor Schone Kunsten van België) en de pendantportrettn van Cornelis de Schepper en Elisabeth Donche (Sydney, Art Gallery of New South Wales).