Bedřich Smetana

Bedřich Smetana (Litomyšl, 2 moarte 1824Praag, 12 meie 1884) was e Tsjechische compositeur die bekend wierd deur den opera Prodaná nevěsta (De verkochte trouwster) en deur de cyclus van zes symfonische gedichtn: Má Vlast (Myn voaderland), waaroender de Moldau (Moldova).

Bedřich Smetana (ca. 1878)

Smetana speeldeg' al piano en viole ost 'n nog styf joenk was. Je studeerdege muzyk an 't conservatorium van Praag. In 1848 wierd 'n gefinancierd deur Franz Liszt, woardeure dat 'n zyn eign muzykschole kost iprichtn.

In 1856 goenk Smetana noa Göteborg in Zweedn woa dat 'n koamermuzykrecitals gaf. Je kwam ook dirigent van de Philharmonische Gesellschaft. In 1859 keerde Smetana were noa Praag en j' oopnde in 1863 were e muzykschole, van deze kè vo de Tsjechische muzyk te promootn. In 1866 wierd 'n dirigent van 't Nationaal Theoater, vo surtout Tsjechische opera's uyt te voern. In 1874 wierd 'n ip kortn tyd doof, e symptoom van syfilis, moa je goenk toch deure mè composeern. Má Vlast wierd vor e groot deel geschreevn achter dat 'n doof gekomn was. Zyn eeste strykkwartet, Uyt myn leevn, is 'n autobiografisch werk die de tinnitus uytbeeldt woarvan dat 'n last had binst zyn doofheid. Deur de syfilis kwam Smetana in 1883 geestesziëk en in 1884 wierd 'n ipgenoomn in de psychiatrische klinyke Kateřinky in Praag, woar dat 'n e poar weekn loater an zyn 60 joar gestorvn is.

Smetana stoat bekend lyk den eeste compositeur die muzyk met e specifiek Tsjechisch karakter schreef. Vele van zyn opera's zyn gebaseerd ip Tsjechische thema's. Je gebruykte Tsjechische dansritmes en zyn melodiën trekn ip volksliedjes. Je was van grootn invloewd ip Antonín Dvořák die ook Tsjechische thema's in zyn muzyk verwerktege.