Belgica (schip, 1884)
Belgica is de name van twê Belgisch' ounderzoeksscheepn. Ze zyn genoemd achter de Romeinse name vô 't nôordn van Gallië.
Den êeste Belgica
bewerkn
Den êeste Belgica wier gebouwd in 1884 in Svelvig (Nôorweegn). Den stoombôot hêette ton nog Patria. 't Was 36 meters lank, 7,6 meters brêed en 4,1 meters diepe, woog 336 ton, en haad een houtn rompe.
Den bôot was ôorsprounkelik gebouwd as een walvisjager, moa wierd deur Adrien de Gerlache vô de Belgischn Antarctischn Expediesje gekocht. De Gerlache noemde den bôot "Belgica", en vertrok dermee up den 16 ogustus 1897 van Antwerpn noar Antarctica.
Den bôot en zyn bemannienge (woarounder Roald Amundsen), brochtn as êesten de wienter deur up Antarctica, ot den bôot up den 28 februoari 1898 kwaam vaste te zittn in 't ys. Pas 13 moandn loater kost het schip hem bevryen deur een kanaal dat de bemannienge zelve haad gegroavn. Up den 5 november 1899 kêerdn ze were in Antwerpn.
De Belgica wier loater upgekocht deur de Graaf van Orléans die t' hope mè Adrien de Gerlache nog verschillende andere expediesjes deed. Achter den Êeste Weireldôorloge wierd de Belgica gebruukt as een dryvende visfabrieke deur de Lofotenvisschery. In de moand meie van 't joar 1940 gebruuktn d' Iengelsn den bôot as een dryvende upslagplekke vor under ammuniesje toet dat den bôot up de 19 meie 1940 in een Duutse luchtanvol wier gezounkn in een fjord teegn Harstad.
De vzw Belgica Genootschap, met in 't besteur ounder andere de klêenzeune van Adrien de Gerlache en d' Antarctica-veteroann Prof. Dr. Tony Van Autenboer en Prof. Dr. Walter Loy, oundersteunn wetenschappelik ounderzoek vô de Belgica as een maritiem erfgoed te bergn en tentôon te stelln.
Ounlangs hèt De Steenschuit vzw een plan gemakt vor een replica te bouwn.
RV Belgica A962
bewerkn
De recente Belgica is een ounderzoeksbôot van de Belgische regerienge, en wor bemand deur de marine. Den bôot stoa geregistrèrd as A962, met as thuushoavn Zêebrugge.
Den bôot wierd in 1984 gedopt deur Keuniginne Fabiola, en is 50,9 meters lank, 10 meters brêed en 5,7 meter hoge. Je weeg netto 232 ton, en volledig bemand en geloan 765 ton.
't Hôofddoel van den bôot is vô de fauna en flora in de Nôordzêe in 't oge t' houdn deur een reekse biologische, chemische, fysieke, geologische en hydrodynamische informoasje te verzameln. Den bôot werkt as een volledig uutgerust laboratorium en werkt dikwils t' hope mè Belgische universiteitn en andere wetenschappelike inrichtiengn.
Êen van de belangryke gebrukers van de Belgica is 't Instituut voor Landbouw- en Visserijonderzoek, Onderzoeksdomein Visserij van de Vlamsche Gemêenschap. In dien hoedoanigheid makt den bôot schattiengn van de stocks van commerciêle vissôortn, meet den invloed van menselike verstôriengn in 't mariene milieu en 't uuttestn van technische innovoasjes vô de visschery.
Den bôot hèt ook een belangrykn updracht van den invloed van olieplekkn up 't milieu noa te goan.
Externe links
bewerkn
|
Ofbeeldiengn die ier by passn ku je vien in de categorie Belgica van Wikimedia Commons. |