Biathlon

Biathlon es nen Olympische wintersport. De sport es een combinoatie van 2 disciplines: langlaufn en schietn.

Geschiedenisse

De sport es ontstoan in Nôorweegn als een oefenienge van et leger in 1861. Van 1924 tot 1948 weirdt de sport als demonstroatiesport toegevoegd an de Olympische Winterspeeln, moar 't wos moar vanof 1960 dat et een echt Olympische sport gekoomn es. Twêe joar doarvôorn wos et êeste weireldkampioenschap geoudn in Ôostnryk. De sport es vrêe rappe uutgegroeid tot êen van de populairste wintersportn.

Regels

De regels zyn gemakkelyk: de beoefeneirs moetn ofwisselend langlaufn en schietn. Het schietn gebeurt ip twêe maniern: liggnd of stoand. Ofankelyk van et sôorte wedstryd zyn er verschillige meugelykeedn:

Vintn individueel: bestoat uut 20 km lôopn, onderverdêeld in viern. Achter ieder onderdêel weirdt er geschootn: liggend, stoand, liggend en ten latste stoan. O de athleetn missn, krygn ze straftyd. De dêelnemers startn iedere kêers mè wa tyd tussn.
Vrouwn individueel: zelfste lyk de vintn, moar ton over 15 km
Vintn sprint: 10 km, woarbie da't er 2 kêers geschootn moet weirdn. Ne kêe liggnd en ne kêe stoand. O ze missn moetn ze een strafronde van 150m ofleggn.
Vrouwn sprint: zelfste gelyk voo de vintn, moar ton over 7.5 km.
Achtervolgienge vintn: de athleetn startn volgens et tydsverschil van nen vôrige race, bievôorbeeld nen sprint. Afstandn zyn 12.5 km, mè 4 schietrondes. Ier geldt ôok et système van strafrondes.
Achtervolgienge vrouwn: zelfst gelyk voo de vintn, moar over 12.5 km.
Relay vintn: weirdt gedoan deur een team van 4 biathleetn, die ollemoale twêe kêers moetn schietn. Voo die discipline meugn de biathleetn 3 reservekogels gebruukn per ronde. O ze nog nie genoeg ein, moetn ze toch strafrondes skien. De ofstand es 7.5 km per athleet.
Relay vrouwn: zelfste gelyk de vintn, moar over 4 kêers 6 km.
Mixed relay: zelfste gelyk nen relay, moar nu mè twêe vrouwn en twêe vintn in êen team

Organisoatie

De sport es dus een Olympische wintersport, moar de normoale kampioenschappn weirdn georganiseerd deur de Internationoale Biathlon Union (IBU). Ze stoan in voo de organisoatie van

De weireldkampioenschappn: weirdn ieder joar georganiseerd.
De World Cup: es een regelmoatigheidscriterium die over een 10tal weekn in de winter lôopt.

Beoefeneirs

De beoefeneirs koomn uut de klassiek sterke wintersportlandn. In et moderne biathlon zyn er 3 sterke landn: Nôorweegn, Rusland en Duutsland. Andere landn die een rolle speeln zyn Vrankryk, Itoalië, Zweedn,...

De bekenste en veruut beste biathleet es Ole Einar Bjørndalen uut Noorweegn. Ie es de recordouder ip olle gebied: mêest aantal goudn medailles (5), mêest aantal goudn medailles ip Weireldkampioenschappn (9) en 77 individuele World Cup titels. Andre noamn zyn Raphael Poirée ( ), Ricco Gross ( ), Sven Fischer ( ),...

Bie de vrouwn es Kati Wilhelm ( ) êen van de sterrn van 't moment, mè 3 goudn olympische medailles en 2 weireldkampioenschappn ip eur noame. Andere grôte noamn zyn Andrea Henkel ( ), Liv Grete Poirée ( ),...

Externe koppelienge

De officieeln site van et IBU

Ofbeeldiengn die ier by passn ku je vien in de categorie Biathlon van Wikimedia Commons.