Corner

Ne corner of hoekschop in voetbol is e maniere van et spel te herstartn at den bol achter de achterlyne èit gewist.

Ne corner

Wannêer is 't corner

't Is corner at den bol hêlegans over d' achterlyne èi gewist (behalve in de golle nateurlik) en et latst angerakt is deur den ploeg die o diene kant stoat ipgesteld.

Cornergebied

De corner weir gegeevn in et cornergebied. Da zyn de vier oekn van et veld. In ol die oekn stoat er ne vlaggestok met e vlagske an en ist er vanof de vlaggestok ne kwartcirkel getêkend mè een stroale van 1 mèter in et veld.

Uutvoerienge

• Den corner weirdt olsan gegeevn vanof dezelfde kant woa dat 'n over de lyne ging gezien ten ipzichte van de golle (links/rechts).
• Den bol moe geleid weirn in diene kwartcirkel en vanof doa weggeshot.
• Êen van 't anvallende team moet den bal wegschietn.
• De verdedigers moetn 9 mèter afstand houdn.
• De speler dien de corner gift mag den bol nie nog een kê anroakn voda nen andre speler em èit angerakt.

Strategiën

Foto van et exacte moment dat de corner is gegeevn van et blauw-witte team.

Elk team oefent vele ip corners en èit wel ne vaste speler die de corner pakt en doar et best in is. De bedoelinge is nateurlik voor et anvallend team dat den deen die de corner gift den bol schiet noar andre spelers van z'n team zoda zyder em kunn binn koppn of schietn. De verdedeginge tracht da nateurlik te vermydn.

Strategiën vo de verdedigers:

Mêestal zet de keeper al ne speler an de vôodste/êeste poale vo te zorgn da et andre team under nie kan verrassn deur kort richtinge êeste poale te schietn en azô misschien e goalle te moakn. Vele stoat er ôok ne man an de twêede poale moestn den bal overgoan dan kantie j' em der achter lôopn en azô olle gevoar doa ôok elimineern. De reste zoekt gwn ne man, mêestal van dezelfde groate e bitje en probeert als den bol weg is em weg te koppn van de goalle of soms over de goalle te koppn. Elk ne man houdn noemn ze ôok "dekkn". De groatste spelers zyn nateurlik et mêeste gevoarlik omda zyder hôger kunn springn en mêer kanse dus èin vo te koppn dus wêrd er mêer ip under gelet. Soms stoat of stoan der ôok nog extra man langs de goal/doellyne vo den bol van de linne te "schepn" of teegnoudn. Verre oaltid verzoameln oal de verdedigers under in de carré of de klêne carré. Mêestal komt den keeper uut en vangt 'n den bol ip vanuut de lucht.

Strategiën vo de anvallers:

Deen die de corner gift schiet verre oaltid me effect omda als je geweune rechtstreeks of rechtduere schiet de keeper veel te gemakkelik wit woa den bol goa landn en ton den bol kan (ip)vangn. De anvallers loapn mêestal in van wa verder zoda ze mêer kracht kunn geevn vo te kopn en de verdedigers moeiliker kunn verdedign. Mêestal schietn den bol zodatn zou landn in et midn van den carré (nie te dichte bie de goalle) zoda de anvallers kunn probeern em derin te kopn. Vo een afwisselinge te moakn schietn ze ôok n' î van tid e kê voor de goalle (êeste poalle) zodat nen anvaller doa loagge kan springn en em binn te kopn azô of binn te "tikn". 't Zelfde wêird gedoan bie de twêde paolle of ofwel schietn ze noa de twêede poale en kopn ze ton richting êeste zodat de keeper er vrê moeilik an kan. Soms past de corngever noa nen teamgenoot die rechtstreeks probeert te schietn ip de goalle of die nog e kê were past zodat deen die de corner pakt me ne anloop ard ip de goalle kan schietn.

Trekkinge en duwinge

Vô en bie corners wêrd er veel getrekt en geduwd dus et gebeur ôok nie zeldn dat er e gele koarte wêrd gegeevn of ne corner ipnieuw gedoan wêrd deur geduw en/of getrek. Verdedigers trekn ôok nogal vele an de shirts van de anvallers zoda ze nie kunn kopn wa eignlik ôok nie mag. Deur da iedren ôok zo oag meuglik springt, gebeurt e wel ne kê dat er e twie een elleboge teegn en kriegt of da ze teegn mekoar kopn woadeur da ze moetn ofgevoert wirn.

Wêetje

Et woord corner komt van et Ingelse corner kick, letterlik in et Nederlands vertoald hoekschop.

Ofbeeldiengn die ier by passn ku je vien in de categorie Corner kick van Wikimedia Commons.