Et Curiosamuseum werd ipgericht deur Antoon Vanneste (Gilwe, 10 februoari 1915). Et was gevestigd in de Peperstroate 24 te Eule, en ’t ield er mee ip te bestoan oat de stichter-conservoator Antoon Vanneste overleedn es ip 6 november 2001.

Antoon Vanneste

Et begun van et curiosamusee goat were noa 1963, wannêer Antoon bezig wos me ’t ipkusen van zyne zoldre en enigste voorwerpn ountdekt et ut de vroegere café die in et uus gevestigd was, genoamd ‘Au Lion d’Or’. Antoon vroeg den oudyzermersjang voe te komne, moa toun da dendien te lange ip nem liete wachtn, begost ie moa zelve ênigste stikkn ip te kuusn en tussn zyn verzoamelinge ipgezette veugels te platsn. Et resultoat bevield’ em wel, en van 't ene kwam 't andre. Stiloan wer d'êne achtr d’andr koamer in ’t uus ingepalmd me nieuwe stikkn.

Et è bykanst ounmeuglik voe ip te sommn wa da d’Antoon in de lôop der joaren allemoale verzameld et. Ol wa moelik te vindn wa, of enigste in zyn sorte, intresseerdeg ‘em. Wat da ipvoalt in zyn verzoamelinge, zyn de twêe grôte domeinn: muzik en legerstikkn.

Muzik was oalsan de grôte passie in ’t leven van Antoon. Dankzy zyn intresse en voardigie sloagdige ie derin om vele oude kapotte instrumentn were speelkloar te moakn.

De militaire vôorwerpn woarn nie zozêre te wytn an de krygsaftige ingesteldheid van de conservoator, moa kwamn vôort ut de twêe weireldôorlogn die en belangryke rolle speeldn in zyn leven: binst den êesten wêerd ie geboorn en binst den twêedn trouwdige Antoon me Antoinette De Lombaerde.

Collectie bewerkn

 
Den grôotstn accordeong ter weireld

Een korte (onvolledige) ipsomminge van de collectie:

  • Militaire elmen ut België, Duutsland, Ôostenryk, Spanje, VS, Rusland, ...
  • Onderden obussen, soabels, geweirn, uniforms, kostums, ridderharnassn
  • Een Duuts en Amerikoans legervliegtuug da in den of ipgesteld woarn, Amerikoanse (zie foto), Britse en Franske legervoertugn, en enigste oude moto's uut WOII
  • Een unieke verzoamelinge muzikinstrumentn me oa.:
    • Een ounderdtal accordeongs, woarounder de grôotstn ter weireld, afkomstig uit Itoalië en 1,9 meiters ôge.
    • 15 oude droaiorgels
    • Zeldzoame muzikdôozn
    • Mechanische piano’s en pianola’s
    • Oude examploarn van bykans alle bestoande muzikinstrumentn
  • Onderden grôte en kleine orloges en stoande klokkn
  • Een verzoamelinge ipgezette bêestn waarounder de grôotste tygre ter weireld en de grôotste ratte ter weireld.
  • Een gereconstrueerd oud caféinterieur (Au Lion d’Or), een oud wienkelinterieur, een oude kloeffemoakery,...

Bronnn bewerkn

Bron(nen):
  • Maes, N. (1995) "Antoon Vanneste, museumconservator", Heulespiegel, nr.22, december 1995, pp.1-9