Medici

Het geslacht De' Medici (of Dei Medici) was en machtige en invloedryke familie, die in Firenze ols grondleggers van 't internationoale bankweezn binst de 15e êeuwe ip 't gebied van kunste een tôonaangeevnde rolle speeldigen.

De leedn van de familie Medici oan invloed op de kunst en de architectuur surtout in Firenze. Z'oan onder andere het Palazzo Pitti met de Boboli-hoovn. Ze begostigen ôok 't Uffizi museum.

Giambuomo de’ Medici zou de groundlegger van de Medici-dynastie gewist zyn. J’is geboorn in 1150. Zyn noame stoat ip ’n inscriptie in de kerke van Assunta in San Pietro a Sieve in ’t Mugellodal, ênigte kilometers van Firenze.

Zyn zeune Chiarissimo zaat in 1201 in de road van Firenze en je was doar ôok ingeschreevn by de wulleweversgilde. Ol de bekende de’ Medici stammn van hem of. In de loop van de volgnde êeuwn splitstn de Medici under in verschillige takkn. Z'evolueerdn van geweune commercantn in de 12ste êeuwe no machtige bankiers in ’t begun van de Renaissance.

Giovanni di Bicci de' Medici (1360-1429) was de stichter van de Medici-bank en de groundlegger van ‘t familiefortuun van ’t machtig geslacht. Je was de zeune van Averardo de' Medici van de Cafaggiolo-tak van de familie.

Zyn oudste zeune Cosimo il Vecchio (1389-1464) zette de Cafaggiolo-tak vôort. Je was den êestn van de polletieke Medici-dynastie, de facto regeerders van Firenze.

Zyn twidde zeune was Lorenzo il Vecchio (1395-1440). Ie stichtte de Popolani-tak.

De Cafaggiolo-tak stierf uut ip ‘t ende van de 16ste êeuwe en de Popolani-tak in de 18ste êeuwe.