De Rode Ridder
De Rode Ridder is ne Vlamsche strip die em ofspeelt in de middeleeuwen.
Deze reekse, wovan 't eeste dêel in 1959 uutgekoomn is, is begost deur Willy Vandersteen in Studio Vandersteen en afgekeken van de gelyknoamige boekstjes van Leopold Vermeiren. De reekse is uutgegeven deur Standoard Uutgeverie en is, neffest Suske en Wiske, êen van de populairste en langst meegoande uut de geschiedenisse van de strips. De mêeste strips zyn ôok gedrukt gewist in doagelikse porties in de gazettn.
In 't begun makte de Willy zowel de têkeningstjes ols de scenario's vo de veroaltjes, loater wierd em gassisteerd deur ounder mêer Karel Verscheure en Eduard de Rop. 't Gienk oundermêer over typische, realistische ridderverhoaln, over tornôoien en slichte leeneern. Achter 'n ende kwoamn Arthur en de ridders van den rounden toafel derby.
Vanof 't zevenendertigste album (De wilde jacht) begost Karel Biddeloo mee te werken deur de schetstjes van Vandersteen uut te werken, mo vanof 't vierenveertigste album (Drie huurlingen) schreef en têkende Biddeloo de vertelliengsjes helegans ip z'n eigen. De veroaln kwaamn mystieker en mystieker. Fantasy-elementn, de verpersôonlikkienge van 't kwoad Bahaal, de goede fee Galaxy en zwarte kunstn werden vaste ingrediëntn. Zels Science Fiction ed em gebrukt.
Sinds da Karel gestorvn is in juni 2004, wordt de reekse vôdergezet me numéro 207 (De grot van de beer) deur 't koppel Martin Lodewijk, die de scenario's schrift, en Claus Scholz die de têkeningstjes makt.