Egyptische mythologie

De Egyptische mythologie goat over de goodn dien d'inweuners uut et antieke Egypte anbeedn.

Beeld van den god Amon uut et tempelcomplex van Karnak.

In et antieke Egypte bestound der polytheïsme of veelgodery. Da wil zeggn dan d'Egyptenoarn in undern godsdienst veel goodn anbeedn. Ze woarn zynder dikkers voorngesteld lik beestn. Die gewunte komt nog van uut nen veel oudern tyd woarin da beestn anbeedn woarn. Dat artikel bespreekt ollene de belangrykste (bekendste) Egyptische goodn en godinn.

Amon-Ra

Amon-Ra of Amon-Re wos den uppergod en zunnegod. De farao wos den zeune van Amon-Ra.

Aton

Aton wos den upperstn zunnegod ounder farao Echnaton. Je wos voorgesteld lik e zunneschyve.

Echnaton èt geprobeerd vo ’t monotheïsme in te voern mè Aton lik enigste god, moar dat es mislukt. Achtern zynen dood gienk Egypte weer over noa de veelgodery van vroeger.

Hathor

De moedergodinne Hathor es ofgebeeld lik en koe of en wuuf mè oorns woa da de zunneschyve tusschn zit. Ze wos zy de godinne van de liefde, van dans en muziek, van de boomn.

Osiris

Osiris stelt d’eirde, et woater, de moane voor. Je wos em ook den god van den ounderweireld.

Isis

Isis wos de troongodinne en de moeder van de goodn. Isis wos de zuster én ’t wuuf van Osiris.

Isis-Hathor

In loatern tyd nom Isis kenmerkn van Hathor over. Isis-Hathor wos de verenigienge van die twee godinn. Ze wos zy de meest populaire godinne van heel Egypte.

Horus

Horus, de valkgod, wos den zeune van Isis en Osiris. Je wos dikkers ofgebeeld lik en valke, of ollene mè nen valknkop.

Thot

Thot wos den god van de moane, de toverkunste (nie ounbelangryk in antieke cultuurn), van den kalender en de kennisse.

Goodngallery

De belangrykste Egyptische goodn:

Amon
Ra
Hathor
Osiris
Isis
Horus
Thot
Ptah