Everybody (lied van Madonna)

"Everybody" is e liedje van en geschreevn deur Madonna en et was eur eerste single, en verscheen loater op eur debuutalbum, Madonna (1983). De menieng'n van de muziekcritici woarn verdèèld. Et liedje kwaam uut als single in de herfst van 1982 en was e top 5 dance muziekhit in Amerika.

Geschiedenisse van het lied

Het lied is de allereerste verkrygboare single van Madonna. Het wier oorsprounkelik gedroaid in clubs voe eur e bitje bekendheid te geven, en was uutendelik èèn van de liedjes woamee da ze e ploatecontract scoorde by Warner's Sire label. "Everybody" is geschreven deur Madonna zelve en geproduced deur Mark Kamins.

Voorda ze e ploatecontract kreeg, gieng Madonna vele nor e club in New York genaamd Danceteria. Mark Kamins was doa èèn van de beste DJs en begost me liedjes te produc'n. Madonna brocht em e poar van eur demo's en Kamis besloot ze te droaien in de club. "Everybody" was èèn van die demo's en kreeg goeie commentoar van et publiek. Toen da Kamin da zaag, besloot 'n voe et lied te produc'n.

Et lied is uutgebrocht in oktober 1982, toen da disco an 't uutsterv'n was en plekke an 't maak'n voe de nieuwe 80s new wave synth pop. "Eveybody" is e simpele boodschap voe iederèèn mee op de dansvloer te kryg'n: "Everybody, come on, dance and sing. Everybody, get up, do your thing." Et lied stelde uus Madonna voren lik da we eur nog gieng'n leren kennen: etwien die danst en ziengt voe eurzelvn uut te drukk'n, en het optimistische karakter da ze d' eerste vuuf joar van eur carrière gienk vuloud'n. Z' et loater nog "Everybody" gezoengen in eur Virgin Tour, Girlie Show Tour en de promotie tour voe et album Confessions on a Dance Floor. Het zinnetje "Dance and sing, get up and do your thing" wier trouwes gesampled in de openingslynen van "Express Yourself" in eur "Blond Ambition Tour".

De cover van de single is e kleurryke collage van Manhattan, getekend deur Lou Beach. Deurda Madonna nie op de cover stound, en al de mesjn op de cover zwartn zyn, peisden ze da ze e zwarte discozangeresse was.

Videoclip

In de videoclip ku je Madonna en e poar dansers zien in Danceteria, de club in New York woar Madonna vroeger danste en woar da et liedje voe den èèste ki speelde. Eur broere Christopher dee de choreographie voe de video en ku je zien als e danser samen met Madonna eur vriendinne Erica Bell. Z' aan moa 1500 dollar voe de clip te maken. Deur de clip was et misverstand da Madonna e zwarte discozangeresse zou zyn wel uut de wèreld.