Frans Stefan (Nancy, 8 december1708 – Innsbruck, 18 ogustus1765)
was de twidde zeune van Leopold van Lotharingen en zyn vrouwe Elisabeth Charlotte van Orléans.
Je volgde zyn voader ip in 1729 als hertog Frans III Stefan van Lotharingen, mo je verloor zyn titel in 1739. ‘t Was de bedoelienge da Frankryk uutendelik Lotharingen zou kunn annexeern deur under kandidoat Stanisław Leszczyński doar an te stelln. Leszczyński was de schonvoader van Lodewyk XV van Frankryk en je krêeg Lotharingen ip vôorwoarde dat et achter zyn dôod in handn zou kommn van Frankryk.
Frans Stefan krêeg als compensoasje et grôothertogdom Toscane, woa da Gian Gastone, de latste Medici, gestorvn was zounder ipvolger.
Frankryk beloofde van de Pragmatieke Sanctie t’anveirdn, woadeure dan de dochters ook de trône van under voader kostn ervn. Ze zoun Maria Theresia steunn als ipvolger van d’Habsburgsche bezittiengn.
In 1745 mocht Frans Stefan Karel VII ipvolgn als Rôoms-Duutsche keunienk en keizer van et Hillig Rôoms Ryk, ounder de noame Frans I.
Frans Stefan en Maria Theresia haan 16 jounges. (elf meisjes en vuuf knechtn).
Under joungste dochter was Maria Antonia, beter bekend lik Marie-Antoinette, die trouwde mè keunienk Lodewyk XVI van Frankryk.
Twi zeuns, Jozef II en Leopold II kwoamn keizer.
Frans Stefan is ol met e kè gestorvn in zyn koetse, ol were kêern van den opera in Innsbruck. J’is begroavn in de Kapuzinergruft in Weenn, siddert 1633 de keizerlikke crypte van de Habsburgers.
