Franz Skarbina

Franz Skarbina (Berlyn, 24 februoari 1849 - Berlyn, 18 meie 1910) was e Duutsche kunstschilder.

Leevn

Skarbina gienk van 1865 toet 1869 noa den academie van Berlyn en doarachter had 'n zyn eign atelier in de Prinzenstraße 21, woa dat 'n ook têeknlesse gaf.

In 1871-1872 gienkt 'n ip reize noa Dresden, Wenen, Venetië, Merano, München en Nürnberg. In 1877 bezocht 'n België, Holland en Vrankryk. In Parys wierd 'n g'influenceerd deur d' impressionistn. Je kêerde ton were noa 't Duuts Ryk en wierd prof an den academie van Berlyn in 1878.

Je weunde van 1882 toet 1886 surtout in Parys. Je reisde in die periode ook in Nôord-Afrika, Holland en België. In 1889 dêed 'n mee an de jubileumexposiesje vo de vierienge van 100 joar Fransche Revoluusje.

Je makte in 1892 dêel uut van de Vereinigung der XI, e kunstgroep in Berlyn woavan dat 'n iprichter was tegoare me zyn moatn Max Liebermann en Walter Leistikow. Je wierd in 1895 illustrateur en adviseur van 't kunstmagazine Pan en je makte dêel uut van de stichters van de kunstgroep Berliner Secession in 1898.

J' is dôod gegoan van e niercrise an zyn 61 joar in zyn weunste in de Königin-Augusta-Straße in Berlyn. Werk van hem is ter te viendn in Duutsche musea en privé-collecties. E grôot dêel van zyn erfenisse is verdweenn in de bombardementn van 1945.

Werk

Allerzieln in Berlyn, 1896
Vrouwe an 't strange, 1883
Kestmarkt in Berlyn, 1892
Friedrichstraße in de reegn, 1902

Vismarkt in Blanknberge

In 1886 schilderde Skarbina De vismarkt in Blanknberge. Ip 't werk is te zien dat de visverkoop gebeurde an 't Visch Verkoopers Huis in de Breydelstroate. De vis wierd ip stroate geleid, sôorte by sôorte. Ook an d' herberge In 't Visscherswelzyn in de Weststroate wierd er vis verkocht. De vismyne kwamt er moa in 1888.

Ofbeeldiengn die ier by passn ku je vien in de categorie Franz Skarbina van Wikimedia Commons.