Gaston Rebry

Gaston Rebry (Rollegem-Kapelle, 29 januoari 1905 - Wevelgem, 3 juli 1953) wos e West-Vlamschn coureur die surtout ekend is deur dat 'n drie kirs Parys-Roubaix ewonn het.

Carrière

A Rebry begunnelienk wos, won 'n indeliks vele koersn. E kwaam prof in 1926 en in da joar won 'n ol rechtet 2 koersn in Vrankryk (Parys-Nantes en Lyon-Belfort) en wos 'n ol 'n derdn in Parys-Roubaix, e koers woa dat 'n 13 kirs gienk an meidoen.

E wonne Parys-Roubaix vou 'n êeste kêe in 1931, e twidde kêe krêeg 'n de koers van de jury, achter dat 'n winnoare (Roger Lapébie) achter e platte tube e villo ekreegn hadde van e liefhebber laasn de boane. 't Joar derup (in '35) won 'n were zevve, deur me twi menuutn 'n hoolf vôor 'n Fransman André Leducq t'arriveern.

In 1934 had 'n zyn beste joar, buutn Parys-Roubaix won 'n ouk de Rounde van Vloandern (in bêestewere me 4 menuutn vôorn Felicien Vervaecke) en Parys-Nice.

In 't roundewerk wos 'n ouk nie slicht, in 1929 mucht 'n vou 'n êeste en 'n ênigstn kêe de gilvn boai andoen in 'n Tour. Zyn bestn Tour rêed 'n in 1931, e wonne toune 1 rit en endigde 'n vierdn (Antonin Magne wonne, Jef Demuysere uut Wervik wos toune 'n twiddn). In 't hêle het 'n 7 kirs de Rounde Van Vrankryk ereen en het 'n 4 rittn ewonn.

E schidde uut me koersn in 1939.

Lapnoamn

Beisn zyn carrière krêeg Rebry êentige lapnoamn:

'n Locomotief: e kuste nie goed sprintn en doadeure trok 'n vele kop van 't peletong of e klinder groeptje, voun te probeern van 't in tuutn en brokkn te ryen. In 't café dat 'n ol beisn zyn carrière dei (Au Paris-Roubaix up de boane van Wevelgem no Mêenn) wos 't er buutn 't parcours van Parys-Roubaix ouk e tring eschilderd, me Rebry in 'n locomotief en aar coureurs die deur de ruutn van de wagongs kêekn.
'n Breier: in de streke van Mêenn en Wevelgem noemdn ze nem ezo omdan zyn zusters sjette en breibucht verkochtn.
'n Bulldog: in 't peletong wos dadde zyn lapnoame, e krêeg die noame omdat 'n klêne en estuukt wos (1m67 en 70 kilo's) en vele karakter hadde.
De Tempobeul
Monsieur Paris-Roubaix: omdat 'n 'n êestn wos die Parys-Roubaix 3 kirs won, loater van tyd is die noame overegoan no Roger De Vlaeminck, die 4 kirs won.

Gent-Wevelgem

In 1934, 't beste joar van Rebry, begustn ze in Wevelgem met e koers ter êre van nem. 't Wos êest e koers voun juniors, 't is wel doaruut da Gent-Wevelgem egroeid is. 't Kwaam e profkoers in 1945, Rebry et 'n dus zevve nôois ereen. En is wel vôorzitter ewist van Het Vliegend Wiel, dat 'n koers organiseerde van 1944 vors.

Menage

Rebry trouwde in 1927 met Martha Vansteenkiste uut Wevelgem. Ze krêegn vier jounges, Gaston Jr. (die zevve nog ekoerst et en loater van tyd e bekendn kunstenoare ekommn is in Canada), Jacques, Jacqueline en Nelly.

In 1953 gienk Rebry dôod en zyn vrouwe gienk no Canada, woa da neur dochter Jacqueline ol wunde. Ouk nunder twêe zeuns gienkn mei.

Externe koppelienge

De Wielersite