Henri Permeke

Henri Louis Permeke (Poperienge, 25 ogustus 1849 - Ostende, 15 september 1912) was een Vlamschn landschapschilder, conservateur en voader van Constant Permeke.

Privéleevn

Henri Permeke wierd geboorn in Poperienge as de zeune van Pierre-Jacques Permeke (1810-1880), een glaswerker en huusschilder, en Nathalie van Haelewyn. Je trouwdige up 3 september 1883 in Burcht mè Stéphanie Buytaert. Je verhuusde ton loater noar Ostende. Zyn zeune is Constant Permeke (1886-1952), de bekendn expressionistische schilder en bêeldhouwer. Zyn klêenzeune is de kunstenoare Paul Permeke. Ot je 1912 stierf wierd je up zyn verzoek begroavn in Ôostduunkerke neffenst zyn vriend, de kunstschilder Louis Artan.

Uplêidienge

In 1873 begost Henri Permeke te studeern an de Brusselse Academie vô Schône Kunstn, met een beurze van de gemêente Poperienge. Binst zyn studiejoarn in Brussel was Permeke in 1876 de medestichter van "L’Essor”, een verênigienge vô lêerliengn en oud-lêerliengn met 't doel van exposiesjemeugelikheedn 't organiseern.

Uut 1877 dateern der schilderyen gelik “Het strand te Oostende”, “Het Kursaal te Oostende in opbouw” en “Poperinge na de hoppepluk”. 't Latste schildery wierd vo 1.200 Fr. gekocht deur zyn gebôortestad.

In 1878 bleef Permeke een endetje in Amsterdam, en kocht Leopold II êen van zyn schilderyen, “Oostende bij regenweer” , noar anleidienge van een groepssalong ingericht deur “L’Essor”.

Professionêel vlak

Vissersbôotn up 't strange van Heist (1891)

In 't begin van 't joar 1878 verhuusde tjie noa Burcht, een pittoresk dorp an de Schelde. J' haad doar een weunbôot dat je ook gebruuktige as een voarend atelier van woa dat je de Vlamsche and Hollandsche woaterweegn verkendige en schilderde. Werkn uut die periode zyn “Schelde bij hoog water”, “Hoekje te Burcht; Schelde”, en “Aanlegplaats te Burcht”.

In 1891 verhuusde Henri Permeke noar Ostende mè zyn vrouwe en zyn zeune en zettigd' hem up as een kunstschilder en ook as restaurateur. Azo kreegt je vô mankoar van 't patrimonium van de stad ostende te meugn restaureern, en herstelde tjie schilderyen in 't Kursaal, godsdienstige werkn in de Sint-Petrus-en-Pauluskerk in Ostende en d' Onze-Lieve-Vrouw-ter-Duinenkerke in Mariakerke, en veel andere schilderyen uut de stedelike verzoamelienge.

In 1897 wierd Permeke angesteld als conservateur van 't Museum vô Schône Kunstn in Ostende, en gedeurende dien tyd leit je der hem up toe 19^e-êeuwse Belgische kunste up te koopn, met ounder andere etsn en schilderyen van James Ensor.

Leêrliengn van Henri Permeke woarn, neffenst zyn zeune, de schilder van visscherstaferêeln Pierre Verbeke (1895-1962) en Daan Boens, die beter bekend is vo zyn gedichtn. Goandeweg kwaamt er echter een generoasjeklove tusschn voader en zeune, ot dendeen mêer up de modeerne maniern wilde schildern.

Artistiek

Henri Permeke schilderde vôrol landschappn: zêegezichtn, stadsgezichtn, en stillevens in een realistische style. Je gebruukte mêesto olieverve en houtskôol. Zyn werkn kunn'n in de volgende musea gevoundn wordn:

Antwerpn, Nationaal Scheepvaartmuseum (6 meter lank gezicht op d' oude rede van Antwerpen in 1885; potlôod)
Jabbeke (Provinciaal Museum Constant Permeke): "De Schelde" (1891)
Knokke-Heist (Stedelike Verzoamelienge): "Vissersboten op het strand te Heist" (1891);
Ostende (Kunstmuseum aan Zee): "Broeltorens te Kortrijk" (1878), "Strand te Heist" (1890), "Badkarren op het strand", "Visput bij de hoeve “De Torreelen”", "Vissershaven" (houtskool)
Poperienge, Gemêentelijke Verzoamelienge : "Poperinge na de hoppepluk" (1877);
Brussel, Koninklijke Verzameling