Hof van Cuba

’t Hof van Cuba in Brugge stound woa da nu de schole St-André is ip de Garenmarkt. De Brugschn dominicoan Jan de Witte is doar in 1475 geboorn en in 1540 gestorvn.

Christoffel Colombus ha Cuba ip z’n êeste reize in 1492 ountdekt en Jan de Witte wierd tout êestn bisschop van Cuba benoemd. Vandoa de noame Hof van Cuba.

In 1834 kocht de familie Dujardin ’t Hof, vo te verbouwn tout bank. De Bank Dujardin kwam êen van de belangrykste bankn van West-Vloandern, mor in 1874 zyn ze failliet gegoan.

In 1859-1860 kwoamn Les Dames de Saint-André, religieuzn uut Doornik, under vestign in Brugge vor e schole ip te richtn vo lêerliengn-religieuzn. Ze vestigdn under êest in de Freren Fonteinstroate. In 1877 kostn z'an ’t gebouw en de groundn van de Dujardins ip de Garenmarkt geroakn mè nog ’n huus d’r neffest. D’r wierd in 1885 nog ground angekocht over de Reie van de vroegere Eekhoutabdye en achter dat de Reie gedempt was wierd er nog bygebouwd.