Jacob De Meyere
Jacob De Meyere, Frans: Jacques de Meyer(e), Latyn: Jacobus Meyerus (Vletern, Frans-Vloandern, 27 januoari 1492 - Brugge, 5 februoari 1552) was e Vlamsche paster, humanist en historicus. Je noemde hemzelve ook Meyerus Baliolanus. In dien tyd was 't de gewente van by de Latynsche noame ook de geboorteplekke te vermeldn. Baliolanus verwyst noa Belle (Bailleul), de stad die dichte by zyn minder bekend geboortedorptje Vletern ligt. De Meyere wordt de 'Voader van de Vlamsche geschiedschryvers' genoemd.
Eêst gieng De Meyere noa schole in Vloandern en van ca. 1509 toet 1515 leêrdeget ie theologie en filosofie an de Sorbonne in Parys. Loater wast ie paster in Yper en je trok ton noa Brugge woa dat ie e schole leidde en kapeloan was van Sint-Donaas.
Van 1543 toet an zyn dôod in 1552 wast ie paster van de Sint-Antoniuskerke in Blankenberge, woa dat er loater e stroate noar hem vernoemd is.
Werk
bewerknDe Meyere schreêf in 't Latyn over de geschiedenisse van Vloandern. Zyn eêste werk Jacobi Meyeri Baliolani Flandricarum rerum tomi X van 1531, was een historisch-geografisch essay van e stik of tjestig bladzydn verdêeld in tien hoofdstikkn.
Doarachter bleêft ie gegeevens verzoameln en je reisde doavoôrn noa kloôsters en gemeêntn vor in d' archievn te kykn en stikkn te kopieern. In 1538 kwam zyn Compendium Chronicorum Flandriae uut. Doarin wierd de geschiedenisse van Vloandern overloopn van 445 toet 1278, ingedeêld in rubriekn volgens de noamn van d' ipeênvolgende groavn.
In d' herwerkte Annales is die compendiumtekst ipgenoomn en is de geschiedenisse voôrtgezet toet in 1477 (dôod van Karel de Stoutn). D' eêste publicoasje dervan gebeurde mor in 1561 deur zyn neve Antonius De Meyere.