Jacob van Maerlant

Jacob Van Maerlant (Brugse Vrye, ca. 1230 - Damme, 1293) wos nen Vlamschn schryver die schreef in de volkstoale. Y eit zuk en kart miljoen verzn van 't Latyn na 't Diets vertoald.

Stambild van Jacob van Maerlant in Damme, gemakt deur Hendrik Pickery

Miniateure in de Spieghel Historiael (ca. 1325-1335)

Leevn

Jacob van Maerlant is round 1230 geboorn in de streke van Brugge en je weunde in Damme, in dien tyd de vôoroavn van Brugge. Da woarn ton vree ryke steedn woarda ter vele an commerce werd gedoan. Je studeerde an de Sint-Donoaskapittelschole en oalde z’n bronn uut d’abdyen Ten Duunn en Ter Doest.

In 1260 est'n em na Zêeland gegoan vo der in 't plekske Maerlant (by Den Briel) koster te kommn. Doar begost ie te schryvn; voorol ridderromans vo ryke Zêeuwsche adelykn. Je schreef er Alexanders Geesten, nen boek (helegans in verzn) over 't leevn van Alexander de Grôotn, De Historie van den Grale / Merlijns boec, over keunink Artur, en ôok de Istory van Troyen, over den Trojaanschn oorlog en de zwerftochtn van Aeneas.

Rond 1270 kêerde em were na Damme en doar schreef em zyn bekendste werkn:

Der naturen bloeme, KB KA 16

• Der naturen bloeme (1270); e verzoamelinge van 13 boekn over plantn, bêestn en andere miensnrassn. Als bron gebruukte em iervo 'De natura rerum' van Thomas van Cantimpré.

• Den Rijmbijbel (1271); e vertellinge van de bybelsche geschiedenisse. De geestelikkn woarn der in 't begun teegn omda et in de volkstoale geschreevn wos en da ezo iederêen den Bybel kost leezn.

• De Spieghel historiael (1285); z’n grôotste werk woarin da de hêle geschiedenisse tot an den êerstn kruustocht verteld werd. Da werk bestound uut mêer dan 90 000 verzn!

J'es verzekers gestorvn in 1293 in Damme. Achter z’n dôod kendn z’n werkn een eruplevinge in de 19e eeuwe bist de Vlamsche Bewegienge. In 1997 èn ounderzoekers gezeid da Van neghen den besten, de beschryvinge van 9 heldn uut de geschiedenisse, ôok van den and van Jacob van Maerlant zyn. Da zou ton zyn latste wirk moetn gewist zyn want Van neghen den besten es geschreevn achter 1291. Mo over da werk zyn ze nog nie hêel zeker.

Up de markt van Damme, vô 't staduus, stoat er 'n standbild van em.

Externe koppeliengn

• Geschiedenisse van de schryfkunst
• Boekn over Jacob van Maerlant

Ofbeeldiengn die ier by passn ku je vien in de categorie Jacob van Maerlant van Wikimedia Commons.