Josuë Dupon

Josuë Dupon (ook Josué of Josue Dupon) (Ichtegem, 22 meie 1864 - Berchem (Antwerpn), 13 oktober 1935) was e West-Vlamschn beeldhouwer en graveur.

Je volgde oavendlessn an den academie van Roeseloare en Antwerpn (1884) en loater an 't Nationaal Hoger Instituut vo Schone Kunstn (1887).

Achter zyn studies het ie êest 'n ende gewerkt in den atelier van beeldhouwer Clement Carbon in Roeseloare. In 1891 het ie e goudn medaille g'hoald met de beeldngroep Samson en de lêeuw en j' is ook twiddn g'endigd in de Prys van Rome vo beeldhouwkunste. Jules Lagae wos e moat van hem. Vanof 1905 toet in 1934 gaf 't ie lesse beeldhouwkunste an den academie van Antwerpn.

Werk

Josuë Dupon is surtout bekend gerakt vo zyn realistische beeldn van exotische bêestn. Zyn beeld de Kemeldryver en twêe groepn beeldn in brons stoan an den entree van de Zoo van Antwerpn.

Je makte ook bustes, oorlogsmonumentn (Ichtegem, Berchem, Hoogstroatn, Roeseloare) en openboare monumentn, lik 't ruterstandbeeld van Constant Lievens in Môoslee (1929).

't Beeld Vint met de pelikoan wos 't vôorontwerp in brons vo de centroale figeure in e fonteine an de Kunstberg in Brussel. By verbouwiengn in 1958 hen ze die fonteine weggedoan en 't beeld verhuusde noa 't Unesco-roundpunt dichte by de stoasje in Brugge.

Dupon makte ook klêne beeldn in ivoor en e dêel medailles.

Beeld van Constant Lievens in Môoslee
Monument an 't Sint-Michielspling in Roeseloare
Beeldn an den entree van de Zoo van Antwerpn

Olympische Speeln

In 1936 kreeg Josuë Dupon postuum e bronzn medaille ip de Kunstwedstrydn van d' Olympische Speeln. Die wedstrydn woarn e dêel van de Speeln tusschn 1912 en 1948.

Externe koppeliengn

Ofbeeldiengn die ier by passn ku je vien in de categorie Josuë Dupon van Wikimedia Commons.