Kanoaleilandn

De Kanoaleilandn (Normandisch: Îles d'la Manche, Frans: Îles Anglo-Normandes, Iengels: Channel Islands) zyn e groep eilandn in 't Kanoal juste vo de Normandische kust van Frankryk. De beweunde eilandn zyn Jersey, Guernsey, Alderney, Sark, Herm, Jethou, Brecqhou en Lihou.

Liggienge van de Kanoaleilandn

Ze zyn verdêeld over twêe baljuwschappn (Iengels: bailiwicks): bailiwick of Guernsey en bailiwick of Jersey. Ze moakn gin dêel uut van 't Verênigd Keunienkryk, moa ze zyn, juste lik 't Eiland Man, ottonome bezittiengn van de Britsche Krône (crown dependencies).

Z'hen allemolle tegoare een ippervlak van 194 km² en der zyn omtrent 158.000 inweuners.

Geschiedenisse

Historisch zyn de kanoaleilandn de latste overbluufsels van 't middelêeuws hertogdom Normandië. In 1066 versloeg hertog Willem de Veroveroare van Normandië den Iengelsche keunienk Harold binst de Slag by Hastings. Je kwam azo keunienk Willem I van Iengeland.

D'eilandn bleevn ounderdêel van 't hertogdom Normandië toet 1204. Ton is Normandië veroverd deur keunienk Philippe II van Frankryk. Moa d'eilandn bleevn wel persôonlik eigndom van den Iengelsche keunienk, ounder de noame bezit van de krône.

Toet in de 19ste êeuwe was ter surtout Normandisch dialect en Frans geklapt ip de Kanoaleilandn. In de 20ste êeuwe zyn die toaln mêer en mêer verdroungn deur 't Iengels.

Ofbeeldiengn die ier by passn ku je vien in de categorie Channel Islands van Wikimedia Commons.