Keunienksdag

Keunienksdag, vodien Prinsessedag en Keuniginnedag, is e nationale fêestdag in 't Keunienkryk van de Nederlandn ter êre van 't stoatshoofd. D'Ollanders versieren under uuzn ton me vlaggen en oranje ballongstjes. De keunienk (vodien de keuniginne) goat ton ip bezoek in 't land, gon kyken no ol sôortn fêestelikeedn die g'oudn wordn. Olle joaren wordn der ook een stik of 3000 Ollanders gelauwerd med een 'lintje' vo de verdienste dan ze vor under voaderland ged en.

Oentstoan

Die traditie is begost in 1885 ter geleegneid van de vuufde verjoardag van prinsesse Wilhelmina. Tonne vierdn ze den dag nog ip 31 ogustus en noemde et êest Prinsessedag. Os Wilhelmina ton keuniginne wier en ze 't veranderd in Keuniginnedag. Den fêestdag is ingesteld deur de liberoaln die ip die manier d'êeneid van Olland wildigen versterkn.

Loatre joaren

Ip 6 september 1948 volgt Juliana ur moeder ip en vanaf 't joar doarip wordt Keuniginnedag ip ur verjoardag, 30 april gevierd. Uut respect vor ur moeder oudt Beatrix, os z' in 1980 keuniginne van Olland wordt, den datum van 30 april.

Wo dan d'Ollanders nog oltyd van klappn is de keuniginnedag van 1979 os Jos Brink keuniginne Juliana spontoan een tote gaf vor ur verjoardag ip TV. En ook nog da Prins Claus in 1999 ip dien dag spontoan een jounk mokstje ol achter ip z'n villo meepakte vor een toertje te doen. Ip den koudstn keuniginnedag, in 1954, was 't -2,5 groadn Celsius, en ip de warmstn in 1993 28 groadn.

In Olland wordn der ip Keuniginnedag overolst ôok rommelmarktn g'oudn.

Keunienksdag

Den 30stn april 2013 is keuniginne Beatrix ofgetreedn en is eur zeune prins Willem-Alexander keunienk gekommn. Doarom wordt Keuniginnedag vanof 2014 "Keunienksdag". 't Wordt gevierd ip 27 april, de verjoardag van Willem-Alexander.

Ofbeeldiengn die ier by passn ku je vien in de categorie Koninginnedag van Wikimedia Commons.