Koasfabrieke Môoslee
- Dit artikel es geschreevn in 't Môoslees, en da zou best ozô bluuvn.
De koasfabrieke van Môoslee ligt langs de Stoatiestroate in Môoslee. Ze ligt moa up 'n poar oenderd mèters van de koasmoakery van Passendoale. De fabrieke es 'n oenderdêel van Belgomilk woa da de merkkoazen van de groep gemakt zyn.
Fabrieke bewerkn
Belgomilk Môoslee es 'n stik van de zuvelgroep Milcobel. Dad es 'n coöperoatie van 4800 melkleveroars. Olle joare oaln ze à peu près 920 miljoen liters melk up.
De produksje in Môoslee es gegroeid van 2000 ton in 1988 toet bykan 8700 ton in 2006. Sichten april 2003 zyn de koazen ollêne nog gemakt me "IKM gecertificeerde melk". Da's 'n système dat vo de kwaliteit moe zorgen by de produksje, d'upoalinge en den transpor van de melk.
Deur d'oltyd mo groddere vroage è Belgomilk g'investeerd in mêer plekke vo de koas te loatn rypn. Nu èn ze 'n capaciteit van 3000 ton, wovan da bykan den elft vo de Brugse Koazen. By die nieuwe rypingskelders es 't er wok 'n hêel moderne lyne vo de behandelinge van de koas, met 'n capaciteit van 35 ton per eure.
Sichten 2005 es 't er 'n hêel nieuwe produksjelyne met 'n styf modernen draineerbak en 'n hêel nieuwe persinstalloasje.
Assortiment bewerkn
- Oud-Brugge:oude koas (1 joar oud), me letter zout in. Sichten 1992 up de mart en intussen nen klassieker.
- Brugse Blomme: zochte delicatesse met 'n pittige smoake
- Brugs goud: vulle rômige koas, me letter zout deur de korte pekeltyd. Oentstoan uut 'n combinoasje van Oud-Brugge en Nazareth Classic. Wos in januoari 2007 de winnoare van de Gouden Archer, ne prys vo de beste lanceringe van 2006.
- Brugs Broodje: ne vulle roamige koas met 'n witte nateurkoste, ideoal vor up de stute.
- Brugse Jonge kaas: arte koas met 'n vulle, roamige smoake; minimum 5 weekn gerypt.
- Brugse Belegen kaas: arte koas met 'n vulle smoake; 4 moandn gerypt.
- Nazareth Classic: delicatessekoas met 'n zoête notesmoake; troage gerypt.
- Nazareth light: koas gemakt van olfvulle melk me moa 15% vet; letter zout deur de korte pekelinge. Deur d'er bacteriên by te doen (Lactobacillus Casei) zorgt de koas wok vor goeie dermflora.
- St Maarten Original: koas met 'n zochte, verfynde smoake; gemakt volgens 'n Kempische recette; moa 9,8% vet, dus styf goêd vo 'ntwiene die up zyn gezoendeid moe lettn.
- St Maarten light Mosterd: vaneigens me mostoardzoadjes.
- St Maarten X-tra: 'n "light" koas lik de Original moa met 'n vullere smoake.
- Watou Special: olfarte koas, met 'n pittige smoake deur minimum 4 weekn te rypen in specioale wakke kelders
- Watou rond of lang: olfarte koas, met 'n roamige, zochte smoake, minimum 4 weekn gerypt; gemakt van gepasteuriseerde melk.
- Brigand: pittige koas, 6 weekn ambachtelik gerypt.
- Ename: olfarte poaterskoas met 'n vulle smoake, minimum 4 weekn gerypt; gemakt van gepasteuriseerd melk.
- La Rame: koas met 'n pittige smoake deur 't aroma van 't bier van La Ramée.
- Corsendonk: typische koas uut de Kempen.