Liggnde wip
Liggnde wip is een oenderdêel van de sport boogschietn. In 't boogschietn ei je drie oenderdêeln, ten êerste ei je 't doelschietn, ten twidde 't schietn ip de liggnde wip en ten derde 't schietn ip de stoande wip.
By doelschietn schiet je ip een ronde skyve, 't doel genoamd, en ge schiet doar natoe met pyln met een punt an vanvôorn. Hoe dichtre by 't centre of de roose da je mikt, hoe mêer puntn da je krygt.
By 't schietn ip zowel liggnde en ip stoande wip schiet je met pyln met ne stompe punt, ze noemn da wok ne kloppre. De bedoelienge van 't spel is da je gekleurde veugels ofschiet. 't Stoan der ongeveer 40 ip de sprange. Der is ênen hôofdveugel; den top, twêe zydn, twêe kalln en al de reste zyn klêne veugels. Ip de stoande wip ei je wok nog nen uul.
In iedere verênigienge wordt der êne kêe ip 't joar ne keunienk of sire gekoozn. Da is dendeen die de mêeste toppn ofschiet in drie ronden. Ols je drie joar tereke sire zyt, wor je automoatisch keizer.