Reegnworms

(deureverweezn van Lumbricidae)

Reegnworms (Lumbricidae), lokoal ook tettienks, teirienks of wurms genoemd, zyn e familie van de ryngelworms (Annelida). Ze komn voorn over heel de weireld, uytgezoenderd in streekn met e styf droog klimoat en ip Antarctica. Weireldwyd zyn der oengeveer 670 soortn bekend.

Deur 't groavn van tunnèls en 't ofbreekn van plantoardig materioal hèn reegnworms e grootn invloed ip de bodemstructeure. By 't triln van de bodem en by reegnachtig were kruypen z' uyt de groend. Ze zyn surtout actief by nachte. 't Zyn ofvaleters die leevn van dood orgoanisch plantoardig materioal. In de wynter kruypn ze dieper in de groend en goan z' in e soorte van wyntersloap of diapauze.

Reegnworms hèn e lankwerpig, typisch wormachtig lyf zoender pootn. Hunder lyf kan bestoan uyt meer of hoenderd segmentn. Van voorn, achter oengeveer 't dertigste segment, zit by vulgroeide reegnworms e verdikkynge, 't clitellum of zoadel genoemd. Reegnworms hèn e redelyk groot herstellyngsvermeugn of regeneroasje, 't verschynsel woardeure dan ze deeln van hunder lyf kunn vervangn die verloorn gegoan zyn.

GeslachtnBewerken

  • Allolobophora
  • Allolobophoridella
  • Aporrectodea
  • Cernosvitovia
  • Dendrobaena
  • Dendrodrilus
  • Eisenia
  • Eiseniona
  • Eophila
  • Ethnodrilus
  • Eumenescolex
  • Fitzingeria
  • Helodrilus
  • Iberoscolex
  • Kritodrilus
  • Lumbricus
  • Microeophila
  • Murchieona
  • Nicodrilus
  • Norealidys
  • Octodriloides
  • Octodrilus
  • Octolasion
  • Orodrilus
  • Perelia
  • Postandrilus
  • Proctodrilus
  • Prosellodrilus
  • Satchellius
  • Scherotheca