Mariakerke (Ostende)

Mariakerke is e plekke an de kust in West-Vloandern en e dèèl van de stad Ostende. Mariakerke telt a peu près 10.000 inweuners.

Geschiedenisse

De Duunkerke II transgressie zettege van de 4e tout de 8ste èèuwe hèèl uze kuststreke ounder woater. Langst de Yzermoundienge stroomdege ’t woater ’t land binnen en vormde diepe kreekn. Met ’t achteruuttrekkn van de zèè in de 7ste en 8ste èèuwe bleeft er e smalle landstroke achter, ’t eiland Testereph. Die landstroke was van ’t westelik ende (Westende) tout ’t oostelik ende (Ostende) 14 km lank en gemiddeld twi km breed. Achter de inpolderienge van ’t gebied ountstoundn d’r e dèèl dorpn woarounder O.L.V.-ter-Streep, ’t loatere Mariakerke.

Mariakerke wordt al vermeld in 1171 (S. Mariae Capella) en ip ’t ende van de 13ste èèuwe (St. Marienkerke Testrep). D’èèste beweuners van Mariakerke woarn verzekers klène boern en schoapherders die ook e bitje an visvangst dein.

Round 1600 ist er by Mariakerke e fort gebouwd, ‘t Albertusfort. Vandoar ook de noame van de wyk (Albertuswyk). Aartshertog Albrecht van Oostnryk aad in Mariakerke zyn oofdkwartier binst ’t beleg van Ostende (1600-1604).

Tout in de 19ste èèuwe was Mariakerke e klèèn boeredorp. Moa deur de groei van de stad Ostende kwamt er assan moa mèèr groundgebied van Mariakerke by Ostende. Gebouwn lik de keuninklike stallingn van Ostende en de Wellington hippodrome stoan in Mariakerke. Van ‘t oud dorp bluuft allène nog moa de kerke over. De zèèdyk wierd in 1896 deuregetrokkn in Mariakerke tout an de Albertuswyk, en in 1901-1902 tout in Middelkerke.

Beziensweirdigheedn

Kykt noa Bouwkundig erfgoed in Mariakerke (Ostende)

Varia

‘t Graf van schilder James Ensor ligt neffest ’t Dunekerksje van Mariakerke (Onze-Lieve-Vrouw-ter-Duinenkerke)
De nieuwe zoale woa da basketploeg Telindus Ostende speelt, de Searena (nu Sluyter-arena), ligt in Mariakerke.

Ofbeeldiengn die ier by passn ku je vien in de categorie Mariakerke (Oostende) van Wikimedia Commons.