Nero (strip)

De avonturen van Nero & Co is een stripreekse van de Vlamse stripschryver Marc Sleen, die van 1951 toet an 2002 praktisch ounofgebrookn in de Vlamse gazettn De Nieuwe Gids, Het Volk en De Standaard. 't Hoofdpersonoage Nero was ol van in 't begin een centroale figeure in den strip, zels in 't begin od het nog "De avonturen van Detective Van Zwam" hêette.

Geschiedenisse

In 't begin van de reekse was de centroale figeure Detective Van Zwam (een name die van zyn collega-joernalist Gaston Durnez kwoam). Up 't moment da Van Zwam hem ontmoetigde weunde Nero in een zothuus en peisde dat je den Romeinsen keizer Nero was. De figeure van Nero nim loater de centroale rolle over en achter negen verhoaln wordt de reeks ommegedoopt van "De avonturen van detective Van Zwam" toet "De avonturen van Nero en zijn hoed". Twêe verhoaln loater kreeg den strip uutendelik de name van "De avonturen van Nero en Co.". De reekse liept ôorsprounkelik in de gazette De Nieuwe Gids, en vanof 1950 in Het Volk.

In 1965 verhuusde Marc Sleen noa De Standaard/Het Nieuwsblad, wa dat een grôte relle verôorzaakte in gazettenland. 't Êeste Neroverhoal in De Standaard, "De Geschiedenis van Sleenovia", was eignoardig genoeg gin produktie van Marc Sleen, moa was getêkend deur "Wirel" (een soamenwerkienge tusschn Willy Vandersteen en Karel Verschuere), binst dat 't verhoal deur Gaston Durnez was geschreevn. In 1992 naam Dirk Stallaert 't têkenwerk voa de Nerostrip over van Marc Sleen, olhoewel dat jie nog olsan 't vertelsel uutpeisde. Up 't ende van 2002 besloot Marc Sleen, up zyn tachtigsten, met Nero te stoppn. "Zilveren tranen" was 't latste Nero-album.

In 1991 wierd er in Turnhout een standbêeld van Adhemar, de zeune van Nero, onthuld, wa dat een verwyzienge is noa de strippryzn die doar uutgerêekt wordn, en die den Adhemar noemn. In 1994 kreeg Nero zelv' een standbêeld in Hoeiloart, de weunplekke van Marc Sleen. Oundertussn kreeg Nero ook een standbêeld up den dyk in Middelkerke, woardan andere stripfigeurn ook een standbêeld hèn. Den piroat Abraham Tuizentfloot kreeg een standbêeld in Wuustwezel (woardat jie volgens hem de slag van Wuustwezel gewonn'n hèt), en Meneer Pheip in Moerbeke, 't dorp woardat jie in de strip ex-burgemeester was.

Personages

Nero: Oervlamse, brave huusvoader met de familiename Heiremans van Brusselse afkomst met moa twêe hoarn up zyn kop. Je verdient zyn brôod as "dagbladverschijnsel" en houdt van 't goeie leevn, een pientje, een zakstje frietn en de gazette leezn in zyn luie zetel binst da zyn vrouwe 't huushoudn doet. Moa j' is ook een grôte curieuzeneuze nieuwsgierigheid, zeker ot er geld by te verdienn is, en dat hèt hem in een hêle resem avonteurn gesleurd. Toch kant je ook altruïstisch zyn, gelik in d' albums "Het vredesoffensief van Nero" en "De pax apostel", woardat jem inzet voa de weireldvrede.
Madam Nero: Hur echte naam is Bea. Z' houdt van theekranstjes mè Madam Pheip, hoedjes koopn en kommeern. Dikwils mak ze up 't ende van een verhoal wafels, olhoewel da se in d' vroege albums vantydn met een dêegrolle gerêed stound (die ton rap weggesmeetn wordt os Nero mè veel geld werekwaam).
Adhemar: Nero zyn zeune. Een uutviender en genie. Neemt die rolle over van Petoetje, die toet Adhemar's geboorte 't wounderkiend van de reekse was.
Detective van Zwam: Den ôorsprounkelike held van de reekse. Een briljantn detective, die een reconstrucsje van een misdoad kant ofleidn van een sigarettepeukstjie. Verplatstigd' hem met een rappe Porsche, en hè olsan een vergrôotglas by hem.
Madam Pheip: Ferme madam en kettienkrookster (ze smôort een pupe mè "fleur de matras"). Trouwt meet den rykn Franstoalign menêer Pheip in "De hoed van Geeraard de duivel".
Meneer Pheip: Zyn echte name is Philemon. J' is een rykn Franstoalign ex-burgemêester van Moerbeke, en achter dat je met Madam Pheip getrouwd is zit je voa 't grotste dêel ounder hur sluffer.
Petoetje: De g'adopteerde zeune van meneer en madam Pheip, moar in feite de zeune van 't opperhoofd van 't eiland Moea Papoea. Toet an de geboorte van Adhemar was tjie den genie van de reekse.
Petatje: Officiêle name Pethalia, g'adopteerde dochter van meneer en madam Pheip.
Clo-Clo Pheip: De zeune van meneer en madam Pheip. Juuste geloik Adhemar bluuft je olsan klêne en kost j' ol van zyn êeste daagn klappn, moar een genie is tje nie. Doavoarn trek zyn karakter te vele up da van zyn pa.
Jan Spier: Den latstn ofstammelienk van Jan Breydel, uutboater van een frietkot woarda Nero olsan een gratis zakstjie frietn kan krygn. As de sterke man van de reekse kwaamt je goed van passe moar vor êen of andere reden verdweent je voar een tyd uut de reekse, en otje ton werekwaam hèt Sleen hem per abuus met Isabella (de vrouwe van Jef Pedal, die ol lange uut de reekse was verdweenn) gekoppeld.
Oscar Abraham Tuizentfloot: Een klêenn upvliegendn piroat, met een piratenhoed-met-dôodskop en een gevoarlik zwoaiend kromzwoard. Zyn uutspraakn zyn deurspekt met zyn stopwôord "aha!".
Kapitein Oliepul: De lichtelik benevelde kapiting van de slêepbôot "His Majesty Pull" woamee dat je de zeven zêen bevoart, en Nero dikwils uut moeilike situoaties kom reddn.
Ricardo: Een schurk uut Malta die hem olsan up Nero wil wreekn.
Jef Pedal (oftewel "Jef met de Hamer") en zyn vrouwe Isabelle kommn ollêene in de vroege verhoaln voarn.

Têkentrant

Nero is een humoristische reekse vul mè kolder, absurde kluchtn en antiheldn met herkenboare menselike gebreekn. Sleen zyn têkentrant is vrê soepel en los. Deur de snelheid woamee da Marc Sleen zyn strips têkende was ter nie veel tyd voa close-ups of panoramisch perspectief, en zaatn zyn verhoaln vul mè continuiteitsfoutn. Moa da was een dêel van de charme van de Nerostrip.