Ourthe (departement)
't Departement Ourthe (Frans Département de l' Ourthe) was e Frans departement in de Nederlandn. 't Is genoemd noa de riviere de Ourthe. 't Omvatte oengeveer de Belgische provinsje Luuk van nu en eenigte stiksjes die nu in Duutsland liggn.
't Departement wierd gevormd in 1795 achter d' annexoasje van de Zuudelyke Nederlandn by Vrankryk, deur soamnvoegienge van 't kernstik van 't prinsbisdom Luuk, 't abdeyevorstndom Stavelot-Malmedy, 't hertogdom Limburg en stiksjes van 't hertogdom Luxemburg, 't groafschap Noamn en 't hertogdom Broabant.
Hoofdstad van 't departement was Luuk. 't Was ingedeeld in de volgnde arroendissementn en kantongs:
- Arroendissement Luuk:
- kantongs: Borgworm (Waremme), Dalhem, Fléron, Gloaien (Glons), Herve, Hollogne, Luuk, Louveigné en Seraing.
- Arroendissement Hoei:
- kantongs: Avennes, Bodegnée, Ferrières, Héron, Hoei (Huy), Landen en Nandrin.
- Arroendissement Malmedy:
- kantongs: Aubel, Eupn, Kronenburg, Limburg, Malmedy, Sankt Vith, Schleiden, Spa, Stavelot, Verviers en Vielsalm.
Achter de val van Napoleong by Woaterloo in 1814 wierd 't grotste deel van 't departement krachtns de Nederlansche groendwet ommegezet in de Nederlansche provinsje Luuk. 't Oostelyk deel (Eupn, Malmedy, Sankt Vith, Kronenburg, Schleiden) kwam e deel van de Pruussische Reynprovinsje.
Eupn, Malmedy en Sankt Vith wierdn in 1919 by België gevoegd.