Planktong is e verzoamelynge van organismn die surtout zweevnd in 't woater (of lucht) leevn en die vor hunder te verplatsn ofhankelyk zyn van stromyngn (of wynd). In zeien en oceoann zyn z' e belangryke voedselbronne vo vele klêene en grôte woaterorganismn, lyk twèekleppige beist'n, visn en walvisn.

Verschillige sôort'n planktong

Mariene planktong omvat bacteriën, archaea, algn, protozoa en dryvnde beist'n. Zoetwoaterplanktong leeft in meern en riviern. Planktong wordt geweunlyk anzien lyk organismn die in 't woater leevn, moar aeroplanktong dryft roend in d' atmosfere en 't omvat plantespoorn, poln, zoad'n en micro-organismn die deur de wynd verspreid word'n. Vele planktongsôort'n zyn microscopisch klêene moa ze bestoan in verschillige grottes, woaroender grôte organismn, lyk kwaln.

Planktong wordt ingedeild in verschillige groep'n:

  • Phytoplanktong, ofhankelyk van fotosynthese, woaroender algn en bacteriën
  • Zoöplanktong, zweevnde of dryvnde organismn die leevn van phytoplanktong of bacteriën
  • Mycoplanktong, schimmels of zwamn
  • Bacterioplanktong, bacteriën en archaea
  • Virioplanktong, virusn