Poten kappen

Poten kappen (Nederlands: klauwverzorging, Iengels: hoof trimming) is 't doen van ounderoed an de poten van surtoe melkkoein. Ook vette beestn, schoapn en gêetn worn under poten gekapt. Ook voe pern wordt da gedaan, mo ze spreken tonne van hoefverzorgienge.

Oogproductieve koeien

't Zyn surtoe d'oogproductieve melkkoein die regelmoatig moeten gekapt worn. De Vlamse koeiboeren die e bitje voe de voruut zyn doen 't ene keer per joar voor al under koeien, mo lik d'Amerikaanders doen 't zelfs twee keers per joar voor al under koein. In Amerika doen ze 't meer omdat under voeiers meer eiwit bevatten. Da's surtoe deur da ze adaar meer luzerne geven. Meer eiwit in de voedinge resulteert in e rappere oorngroei, wodeure da ze zoen begun manken a je die klauwen nie ounderoedt. In praktyk worn mo zuste d'achterpoten gekapt. An de voorpoten zyn der in Vloandern nie veel gin problemen. Da komt omdat 't meeste gewicht van een melkkoe ip eur achterste poten komt, en oe oger de druk ip e klauwe, oe rapper dat em groeit, en dus in vele gevallen begunt scheef te groein.

Langleefbaarheid en koeiewelzyn

Met andere woorn, poten kappen is een werksje die de langleefbaarheid en 't dierewelzyn van je koein in oge moate verbetert.

Infecties van de klauwe

Met poten kappn kun der infecties van de hoorn genezen worn. De voornaamste bacteriële infecties zyn stinkpoot en mortellaro. Die bacteriële infecties gaan de boern meestal ook proberen kwyt te geraken deur de koein regelmoatig een voetbad te geven. De koein kun a ze uut de melkstand der deure lopen. In da voetbad stoat er oungeveer 15 cm woater met daarin een aantal ountsmettende productn.

Bevangeneid

Nog een ander affairen da ze met poten kappn kun iplossen is de zogenaamde "zokke", bevangeneid, een klauwe die ountwikkelt lik een slobberende zokke in te plekke van een schone normoale koeieklauwe. Da's een probleem da koein soms ne keer en achter 't kalvn.

Kriekn

Een krieke kun je vergelikkn met een blare ip je voetn. A je nieuwe schoen et kun je da wel ne keer en. Koeien kun bevoorbeeld een blare krygn deur ip een keitje te loopn.

Oe wordt da gedoan?

De koein gaan in e travallie. Ze doen dadde e bitje lik da'm wyder no den tantist gaan, met tegengoeste, mo ze zyn wel content a ze 't get en. In de travallie zet je ze vaste da ze nie kun weg loopn of stampn no de potekapper, en ook da ze zelve nie zoen kun omme vallen. A da gebeurd is, trek je met een katrolle enen achterpoot omoge toe ter ogte van je knien. In een eerste stap kuus je de te ounderoen poot af. Da wordt meestal gedaan met schavelingn. Ton wordt de poot vlak gezet. Da wil zeggen da je zorgt lik voor e schoe da de klauwe an eurnen ounderkant helegans vlak is, dat de koe eurne poot nie meer scheef zoe staan. Ton wordt 't model gekapt. Da wil zeggen dat tussen de twee klauwn van de poot een model wordt gesneen zuste lik de binnekant van je schoe. In een latste fase worn de foutjes weggewerkt. Met foutjes bedoeln we ounder meer littekens van kriekn en pleksjes van stinkvoet en andere concrete probleemtjes.

Wo kun je da leren?

Vele boern leren dadde in de landbouwschole. Ook de boereverenigiengn geven daar cursussen van.

Meer informatie

• GRONDMAN,W., et al., Beslissen van kalf tot koe, uutgegeven NRS BV, Arnhem, 2006. ISBN 90-810966-3 - www.vrv.be/algemeen/publicaties