Hoofdmenu openen

Robrecht III van Vloandern

(deureverweezn van Robrecht van Béthune)
Robrecht III van Vloandern
1249-1322
Robert3.jpg
Blason comte fr Nevers.svg
Groaf van Nevers
Periode1272-1280
+ Yolande van Bourgondië
VôorgangerJean Tristan van Valois
IpvolgerLodewyk I van Nevers
Blason Comte-de-Flandre.svg
Groaf van Vloandern
Periode1305-1322
VôorgangerGwyde van Dampierre
IpvolgerLodewyk I van Vloandern
VoaderGwyde van Dampierre
MoederMathilde van Béthune

Robrecht III van Vloandern of Robrecht van Béthune, bynoame De Lêeuw van Vloandern (1249Yper, 17 september 1322), was groaf van Nevers van 1272 tout 1322 en groaf van Vloandern van 1305 tout 1322.

Robrecht was den oudste zeune van Gwyde van Dampierre en zyn êeste vrouwe Mathilde van Béthune. Je speeldeg e belangryke rolle in 't conflict tusschn Vloandern en Vrankryk, en 't was surtout deur hem da zyn voader zyn lêenhêre Philippe IV le Bel nie mer anveirdeg als suzerein.

In 1299 was zyn voader zodoanig verzwakt deur al de miserie en den ouderdom, dat 'n in november de regerienge van 't groafschap Vloandern overdroeg an Robrecht. In meie 1300 wierdn ze gevangn gezet: zyn voader in 't kastêel van Compiègne, Robrecht in Chinon en zyn broere Willem van Crèvecoeur in Issoudun.

Robrecht kwam mo vry in 1305 en je kost dus nie meegedoan hen an de Guldnspoornslag, in teegnstellienge mè wa dat Hendrik Conscience schrêef in zyn boek De Leeuw van Vlaanderen.

Vrouwn en joungesBewerken

Je trouwde in 1265 mè Blanche van Anjou (1250 † 1269), dochter van Charles I van Anjou (loater keunienk van Sicilië). Z'haan êen zeune:

  • Karel, die stierf an zyn elf joar

J'hertrouwde in 1272 mè Yolande van Bourgondië († 1280), gravinne van Nevers en weeuwe van Jean Tristan van Valois.

Under jounges:

  • Lodewyk I van Nevers (1272-1322), groaf van Nevers en Rethel, voader van Lodewyk I van Vloandern
  • Robert van Cassel († 1331), hêere van Marle en Cassel, getrouwd mè Johanna van Bretagne
  • Johanna (Jeanne) († 1333), getrouwd mè Enguerrand IV van Guînes, hêere van Coucy
  • Yolande († 1313), getrouwd mè Gauthier III van Enghien
  • Mathilde, getrouwd mè Matthias van Lotharingen

Robrecht van Bethune liet hem in Italië ipmerkn ip militair gebied, ost 'n vocht an de kant van zyn schonvoader Charles van Anjou (1265–1268) teegn de latste Hohenstaufns, Manfred en Conradin. In 1270 giengt ie mee mè zyn voader in den achtstn kruustocht no Tunis, oender leidienge van de Frãnsche keunienk Louis IX.

Weregekêerd in Vloandern blêeft ie zyn voader steunn in zyn stryd teegn de Frãnsche keunienk Philippe IV le Bel, die Vloandern were by 't krôondomein wilde briengn.

Zyn regeriengeBewerken

Zyn voader, Gwyde van Dampierre, stierf in e kerker in Compiègne en Philippe IV le Bel hoalde doa zyn profyt uut. In juli 1305 mocht Robrecht en zyn broere Willem mè 't lyk van under voader were kêern no Vloandern, mo je most 't Verdrag van Athis-sur-Orge têekenn.

Hêel Robrecht III zyn bewiend stoend in têekn van d'uutvoerienge van da verdrag. Je wierd als groaf van Vloandern erkend, mo je most wel lêenhulde briengn an de keunienk en alles droaideg uut in 't vôordêel van Vrankryk.

't Verdrag was e rampe vo de Vlamsche economie. De Vloamiengn mostn e joarlikse rente van 20 000 poend betoaln an de Frãnsche keunienk, en ook nog vier ipêenvolgnde joarn e somme van 100 000 poend. De stadsversterkiengn roend de grôote steedn Brugge, Gent en Yper mostn ofgebrookn wordn, en de kasselryen Rysel, Orchies en Dowoai wierdn bezet deur de Frãnsche als woarborg. Als straffe vo de Brugse Mettn mostn der 3000 Bruggeliengn ip bedevoart goan, woavan 1000 overzêe.

Den 11stn juli 1312, juste tien joar achter de Guldnspoornslag, wierd et Verdrag van Pontoise getêeknd, woaby da Robrecht de steedn en kasselryen Rysel, Dowoai en Béthune ofstoend an Vrankryk. Je krêegt doavôorn den helt van de 20 000 poend rente, ipgeleid an Vloandern deur 't Verdrag van Athis-sur-Orge.

Robrecht stierf in september 1322 en je wierd ipgevolgd deur zyn klêenzeune Lodewyk II van Nevers. Zyn zeune, Lodewyk I van Nevers, was twi moandn idder gestorvn. J'is begroavn in de Sint-Moartnskathedroale van Yper.

 
De groavn van Vloandern in de Groavnkapelle van Kortryk. Van lienks:
Robrecht III - Lodewyk I - Lodewyk van Male - Margaretha van MaleFilips de Stoutn