Saint-Maurice Pellevoisin

Saint-Maurice-Pellevoisin es e plekke in Vrankryk in't Noorderdepartement. 't Ligt in Frans-Vloandern, mêer bepoald in Rysels-Vloandern. Saint-Maurice-Pellevoisin wos tout 1858 e wyk van Fives tot da't by 't stad Rysel wierd gesmeetn, tesedert es't ne wyk van Rysel. 't Ligt o de nôordôostkantn van't stadscenter van Rysel, ip de boane richtienge Roboais en Terkoeje. Der weun'n apeupri 17.000 mienschn.

Saint-Maurice Pellevoisin grenst an de gemêentn Berkem, Marcq-en-Barœul en Mons-en-Barœul en an de Ryselse wykn Fives en Rysel-center.

Saint-Maurice wos in tydde een klêen boeredorptje da van Rysel geschee'n wos deur de stadsmeurn van Vauban. Nu ligt Saint-Maurice nog olsan e bitje ofgesnee'n van't center deur de rienk van Rysel (mêer precis de D651-ottoboane). Ôorsprounkelyk noemdigde 't de "Faubourg de Roubaix" mè da't ip de boane noa Roboais lag. In dien tyd wos't uut militaire oovrweegiengn verbood'n van stêen'n uuzn dichte by de verdeedigiengsmeurn te bouwn, vandoar da de mêeste uuzn in dien tyd gemakt wiern in vakwerk mè outn'n bolkn mè da je ze in nôodtoestand in êen eure moeste kunn'n ofbreekn. In d'n twidd'n elft van de neegntiende êeuwe kreeg de wyk nen serieuz'n groei in d'industrie, wa ôok de bevolkienge dee groei'n en de plekke mêer en mêer dee ansluutn by de bebouwienge van 't stad Rysel. In recente joarn wierd'n der in Saint-Maurice surtout vele buuroots en ôogbouwweunieng'n gebouwd in noavolgienge van't nêerepôotn van de commerciële wyk Euralille, wa juuste van den oovrkant van de rienk ligt.

Beziensweirdigeedn bewerkn

De Notre-Dame-de-Pellevoisin-kerke uut 1906
De Saint-Maurice-des-Champs-kerke uut 1879
De Notre-Dame-du-Rosaire-kapelle die gebruukt wordt deur 't Pius X-broederschap
't Sint-Thomas-van-Aquino-klôoster oftewel 't dominicoaneklôoster, mè by-ôor'nd'n of (Jardin des Dominicains).
't Grôot seminoarie van 't bisdom Rysel
't Château Droulers wa nu dienste doet lyk 't wykstaduus
't Château des Buissonnets è 't by-ôor'nd park
't Ôosterkerkof van Rysel (cimetière de l'Est)

De Notre-Dame-de-Pellevoisin-kerke
De Saint-Maurice-des-Champs-kerke
't Grôot seminoarie
Château des Buissonnets

Ofbeeldiengn die ier by passn ku je vien in de categorie Saint-Maurice-Pellevoisin van Wikimedia Commons.