Bart Herman
Bart Herman (Wevelgem, 14 februoari 1959) es ne West-Vlamsche zanger. Zyn muziekgenre valt best t' omschryvn lik e miengelienge van luusterlied, rock en roll, TexMex en Latynse ballades.
Biografie bewerkn
Bart Herman es geboorn ols twiddn van drie joengns. Ie gienk noa de loagere en middelboare schole in Kortryk, Sint-Nikloas en Wettern. In 1981 es-t ie hem ofgestudeerd ols licentioat Germoanse filologie an de katholieke universiteit in Leuven. Achter zyn studies koos-t ie hem juste lik zyn voader, grôovoader en achtergrôovoader vo de muziek. Binst zyn studies en legerdienst wos-t ie ol styf actief ols singer-songwriter.
Van 1984 toet 1989 wos-t ie literair vertoaler an den universiteit en reisorganisateur en begeleider in den toeristische sector.
End 1989 vertrok-t ie noar Amerika, allêne moa mè zyn gitare. Achter e zwerftocht deur 't westn (Arizona, California, Nevada) gerakte-t ie an e contract ols zanger-entertainer ip de SS Victoria, e cruiseschip dat hem via de Caraïben noa Zuud-Amerika brocht en loater noa de Baltische stoatn, Rusland en Scandinavië. 't Wos binst die reize dat ie decideerde van definitief zyn beroep te moakn van ziengn.
Muziek bewerkn
In 1990, binst nen tussestop in België, kreeg-t ie achter 'n iptreedn e ploatecontract angeboodn en ip 't ende van da joar kwam zyn êeste ploate uut. "Wat ik voel" wos e radiohit en zyn besluut stound vaste van vôort te doen in 't Nederlands. In 1993 had ie zyn êeste numero 1 hit vaste "Ik ga dood aan jou", gevolgd deur zyn êeste full-cd "Metropool" die zounder veel moeite goud hoalde.
Intussn hèit ie hem ol tien cd's uutgebrocht en es-t ie ne veelgevroagdn artiest. Bart Herman hèi toe nu toe twi numero 1 hits ip zyn noame stoan: "Ik ga dood aan jou" en "Slaap m'n kind" en ie won drie kêers nen trofee ip Radio2-zomerhit (1993, 1994, 2001). Ie speelde de rolle van Pontius Pilatus in de musical Jesus Christ Superstar (2 kêers Vorst Nationaal).
Bart Herman schryft zyn eign liedjestekstn en vertoalde ôok vele liedjes uut 't Frans, Iengels, Duuts en Spoans noa 't Nederlands. Ie schreef ôok liedjes vor andere zangers lik Dana Winner, Gene Thomas, Peter Van Laet, Barbara Dex, Amaryllis Temmerman, Lisa Del Bo, Willy Sommers, Luc Steeno, Stratovani, De Romeo's, Davy Gilles, Wim Leys, Herbert Verhaeghe, Nicole en Hugo, Jo Vally, Edje Ska en Tatyana Storm.
In 2010 hèit ie hem were e hit met de single "Vlinders, Passie, Stille Tranen".