Boudewyn II van Vloandern

Boudewyn II, bygenoamd de Kletsn (863 - 10 september 918) was de zeune van Boudewyn met den Yzern Oarm en Judith van West-Francië, dochter van Karel de Kletsn. Doadeure wast 'n langs zyn moeders kant van Karoliengische ofkomste. Je was Groaf van Vloandern van 879 tout 918.

Boudewyn II van Vloandern
863918
Groaf van Vloandern
Periode879 -918
VôorgangerBoudewyn I
IpvolgerArnulf I
Groaf van Boulogne
Periode896 -918
VôorgangerErchenger
IpvolgerAdalolf
VoaderBoudewyn I
MoederJudith van West-Francië
E gevecht teegn de Vikings in 879, Grandes Chroniques de France deur Jean Fouquet
(1455-1460)

De Vikings bewerkn

Boudewyn erfde ‘t groafschap van zyn voader in 879 ip e styf slicht moment. Zyn voader was nog mo dôod of de Vikings vieln ‘t land were binn.

De Vikings haan in Iengeland styf verschootn van ’t krachtig verweir van keunienk Alfred de Grôotn van Wessex, die under doa versleegn haad. Achter dan ze g’hôord haan da Boudewyn met den Yzern Oarm dôod was, trokkn ze weg uut Iengeland vor under were ip ’t vasteland te concentreern.

In de joarn 850 en 852 woarn de bendes veel klinder gewist, mo nu woarn z’ofgekommn met e machtig en goe g’organiseerd leger.

Ze kwoamn in juli 879 an land tusschn Bonen (Boulogne) en Kales (Calais). Ze begostn direct te roovn en te plundern in de Sommevalleie en loater nog erger in de Scheldevalleie. Ze trokkn êest no de bisschoppelyke steedn Terwoan en Sint-Omoars, die olle twêe ofgebrand wierdn en ze vernieldn de Sint-Bertynsabdye.

Moa da was mor e begun. Langst de Yzervalleie vieln ze Vloandern binn en langst de Leie en de Schelde trokkn ze tout in Broabant. De plunderiengn deurdn verschillige moandn tout dan z’hunder wienterkamp in de Sint-Boafsabdye van Gent iptrokkn.

De Noorsn inval van 879 wordt anzien ols de geweldigste storm van vernielienge in de streke. Zowel ryke, oarme, gêestelykn of boern mostn vluchtn vo de verschrikkelyke ofslachtiengn en verkrachtiengn.

In 880 trokkn de Vikings langs de Schelde en ze plunderdn Doornik en Noyon. Ze droungn zelfs deure tout in Reims.

Ol were kêern botsn z’ip ’t leger van Lodewyk III van Oost-Francië, die juste were kwam van d’ounderhandeliengstoafel van ‘t Verdrag van Ribemont. Je kost ’n dêel van de Vikings versloan in de Slag van Thiméon (Timionum).

In november kwoamn ze were tegoare in Gent en ze verhuusdn vo de wienter no Kortryk. Den 28stn december vieln ze Atrecht an.

In 881 kost Lodewyk III van West-Francië hunder ’n ende teegn houdn deur zyn overwinnienge by de Slag van Saucourt-en-Vimeu, die bezoungn wordt in ’t Oudhoogduuts Ludwigslied. Moar in 882 ist ’n gestorvn en wierd ’n ipgevolgd deur zyn broere Karloman. Deur da Vloandern e platte streke is mè veel bevoarboare riviern zag Karloman der gin doen an vo 't gebied teegn de Vikings te verdedign en je verplatste zyn grenzn no ’t zuudn tout an d’heuvels van Artesië.

De jounge Boudewyn II, nog moa 20 joar oud, profiteerde van de situoasje en kost hem mêester moakn van hêel ’t verloatn gebied. Je wordt anzien ols de feitelyke stichter van ‘t Groafschap Vloandern.

De Vikings haan under ip da moment in Lotharingen gevestigd, ten ôostn van de Schelde en ze blêevn ’t groafschap bedreign. Boudewyn liet burchtn bouwn o.a. in Brugge, Gent, Sint-Omoars, Sint-Winoksbergn, Broekburg, Veurn, Oostburg, Souburg, Middelburg..., die grôot genoeg woarn vo de beweuners te beschermn. De Vikings kostn gin profyt mer uut under strooptochtn hoaln en ze kwoamn minder en minder noa Vloandern.

Uutbreidienge van 't Groafschap Vloandern bewerkn

Boudewyn kost nu begunn mè zyn polletiek. Je most zyn gezag deur de keunienk loatn erkenn en zyn groafschap uutbreidn.

Ol van in 883 was ter vele contact tusschn Iengeland en Vloandern, vor hunder tegoare teegn de Vikings t’organizeern. In 884 was Boudewyn in Iengeland, woa dat ‘n trouwde mè de dochter van Alfred de Grôotn, de keunienk van Wessex.

Den dôod van keunienk en keizer Karel den Dikkn in 888 speeldeg in Boudewyns vôordêel deur ’t probleem van de trôonsipvolgienge. Karel de Simpeln, de joungste zeune van Lodewyk den Hakkeloare was de wettelykn ipvolger, moa je was nog moa tien joar oud.

Vor e groep Fransche groavn was ’t e goe moment vor under ounofhankelyk te moakn en ze verkoozn Odo I, groaf van Parys en markgroaf van Neustrië, tout keunienk. Odo ha goeie successn g’hoald teegn de Vikings in de belegerienge van Parys (885-886).

Moa Karel de Simpeln blêeft de krône ipeisn. Boudewyn profiteerde van die conflictn en je dêed er olles an vo zyn groafschap uut te breidn, wa dat Odo I styf stôorde. In 892 trok Odo noa Brugge vo Boudewyn te straffn, moa Boudewyn kost hem doa goed wegsteekn en verdedign in zyn burcht.

In 895 koozn Boudewyn en zyn broere Rudolf, groaf van Cambrai, de kant van Zwentibold, keunienk van Lothariengn. In 896 vieln ze Vermandois an en Herbert I van Vermandois most Arras, St. Quentin en Péronne ofstoan. Loater da joar kost Herbert I Rudolf vangn en vermôordn. Uut bloedwroak liet Boudewyn in 902 Herbert I vermôordn. Je liet ook zyn teegnstander Fulco van Reims vermôordn.

Vrouwe en jounges bewerkn

Boudewyn trouwde in 884 in Iengeland met Ælfthryth (of Elfrida) van Wessex, de dochter van Alfred de Grôotn. Under jounges woarn:

J’haad ook nog ’n ounwettige zeune:

  • Albert, bisschop van Parys