Busschn van sentroal Kanada
De Busschn van sentroal Kanada, zyn 'n ekostreeke uut d' ekozôone Nearctis vôgnst de Weirld Nateur-Stichtienge (WWF). D' ippervlakte van d' ekostreeke besloa 36 777 831 êktoarn [1]. Ze maakn dêel uut van 't bioom de boreoale busschn of de tajga van nôordlik Kanada.
Beschryvienge bewerkn
Die ekostreekez strekt êm uut van 't Zuudn van 't Grôot Sleevie-Mêer (Iengls : Great Slave Lake) in de Nôordwestlikke Gebiedn deurêen 't grotste stik van nôordwestlik Alberta, sentroal Saskatchewan en dêeln van westlik-sentroal Manitoba en bestoan uut drie oofd-streekn : 't Bekkn van de Sleev-Rieviere in nôordôostlik Alberta, de lêeglandn van de nôordlikke vlakte van Manitoba, en d' ooglandn te zuudn van 't Kanadeesch Schild van nôordlik sentroal Alberta toe an zuudwestlik Manitoba. Dat is e gemiengld gebied van lêeglandn en bergn toe 800 m ooge, woaroendre gebiedn mê moerassn en vêenn en bergmêern en vyvers. 't Gebied êt e min of mêer nat middn-boreoal ekokliemoat mê korte zoomrs (gemiddelde temprateure 14 °C) en lange, koede wienters (gemiddeld -15 °C) en plekkn mê permafrost in de lêeglandn [2][3].
Plantn-weirld bewerkn
Die busschn lik zoveele in Kanada ip die bridteliggienge, zyn e mienglienge van koniefeern en loofboomn woaroendre Ameriekoansche roatlpopliere (Populus tremuloides), boalsm-popliere (Populus balsamifera), witte sparre (Picea glauca), zwarte sparre (Picea mariana) en boalsm-denne (Abies balsamea).
Bêestn-weirld bewerkn
De wilde bêestn van da gebied omvattn eeland (Alces alces), Ameriekoansche zwarte beir (Ursus americanus), grysde wolf (Canis lupus), Kanadeesche lynx (Lynx canadensis), muul-êrte (Odocoileus virginianus), wapietie (Cervus canadensis), Kanadeesche beevre (Castor canadensis), muuskuusratte (Ondatra zibethicus) en snêewschoe-oaze (Lepus americanus). De vlakte te zuudn van 't mêer êrbergt eeland, prèèriewolf (Canis latrans) en ook Florida-keun (Sylvilagus floridanus). Nasjonoal Park Wood Buffalo ip de Sleev-Rieviere is 't grotste nasjonoal park in Kanada en 't bevat êen van de grotste kuddn van Ameriekoansche biezong (Bison bison) in de weirld.
Veugls omvattn êendn, ganzn, witte peeliekoane (Pelecanus erythrorhynchos), Kanadeesche kroanveugle (Grus canadensis), kroage-oene (Bonasa umbellus) en ysduukre (Gavia immer). De moerasgebiedn van de streeke, lik 't Mêer Cumberland, zyn e belangryk vluchtôord vo trekveugls en omvattn de belangrykste broedpopuuloasjes van de bedreigde trompêtte-kroanveugl (Grus americana) in Nôord-Amerika.
Bedreigiengn en beschermienge bewerkn
De êft van 't nateurlik bus bluuft oengerept, den andrn êft is angetast of weg deur uutgebreidn oetkap, uutboatienge van oolje en goaze en mynbow. Blokn van oerbus omvattn 't Park Wood Buffalo, en de gebiedn roend Mêer Cold, Mêer Primrose en Mêer Doré, Nasjonoal Park Prins Albert, toe an 't Nôordn van Mêer Cumberland, Nasjonoal Park Rydnde Berg, Porsupajne-Euvls, Provinsjoal Park Duck Mountain (by de stad Kamsack) en de Delta Peace–Athabasca an de Sleevie-Rieviere. Andre beschermde gebiedn zyn Clearwater-Rieviere, Provinsjoal Park Meadow-Mêer (by Goodsoil, Saskatjeewan) en Provinsjoal Park Narrow Hills.
Zied ook noa bewerkn
| Boreoale busschn uut 't Nearctis | |
|---|---|
| NA0601 Boreoale bergbusschn van 't Alaska-Schiereiland | Alaska (USA) |
| NA0602 Busschn van 't sentroal Kanadeesch Schild | Kanada |
| NA0603 Boreoale busschn roend de Cook-Golve | Alaska (USA) |
| NA0604 Boreoale busschn van de Koopre-Ôogvlakte | Alaska (USA) |
| NA0605 Boreoale busschn in ôostlik Kanada | Kanada |
| NA0606 Tajga van 't ôostlik Kanadeesch Schild | Kanada |
| NA0607 Vlakte-tajga van Binn-Alaska en Joekon | Kanada/USA |
| NA0608 Busschn van sentroal Kanada | Kanada |
| NA0609 Busschn van 't westlik Kanadeesch Schild | Kanada |
| NA0610 Tajga tusschn de Muskwa-Bergn en 't Grôot Sleevie-Mêer | Kanada |
| NA0611 Busschn van d' ooglandn van Newfoundland | Kanada |
| NA0612 Busschn van 't nôordlik Kanadeesch Schild | Kanada |
| NA0613 Busschn van de nôordlikke Kordieleera | Kanada |
| NA0614 Tajga van de Nôordwestlikke Gebiedn | Kanada |
| NA0615 Woestenyn an de kustn van de schiereilandn Avalon en Burin | Kanada |
| NA0616 Tajga an de zuudlikke Hudson-Boaje | Kanada |
| NA0617 Drooge busschn van 't binneland van Joekon | Kanada |
Eksterne koppliengn bewerkn
Verwyziengn bewerkn
<references>