Hoazelwormes zyn êen van de weinige sôortn lokketetsn zounder pôotn. Ze kommn oek in West-Vloandern vôorn, mo zeker nie overol.

'n Kop van en oazelworme

Uutzicht bewerkn

Hoazelwormes kommn toet 50 cm lank, zyn mêestol bruunachtig toet grysde en zien der uut lik slangn, mo 't zyn dus lokketetsn. Egliek kuj 't verschil gemakkelik zien:

  • Z'hen gin nekke lik dan slangn wel hen, nundern kop is oek nie driehoekig.
  • Z'hen oogleedn, etwot dan slangn nie en hen.
  • Nunder oogn zyn over 't algemêen klinder dan van slangn.
  • In West-Vloandern zittn der gin slangn in 't wilde, in d'Ardenn bevôorbeeld wel.
  • Slangn zyn vele klibberder of hoazelwormes en kruupn oek zidder deur specioale schubbn up nundern buuk.

Vôortplantienge bewerkn

De wuvetjes zyn leevndboarnd (d'eiers kommn uut juuste vôorn an de joungn ebôorn zyn). Êentige doagn vôorn de geborte, zoekn ze de warmte van de zunne up voun d'eiers zidder te loatn uutkommn.

Verspreidienge en leefgebied bewerkn

Hoazelwormes leevn ossan up de ground, surtout woa dan der vele bloarn en dôod hout liggn. Ezô kunn ze nunder gemakkelik verduukn en vienn ze oek gemakkelik teetn (fernient die doar oek roundkruupt).

In West-Vloandern vien je ze oek, mo vele en zie je ze nie. Da komt omdan ze nie overol vôornkommn en dan ze surtout me de schemer actief kommn.

Bedreigiengn bewerkn

Surtout fazantn zyn indeliks slicht voun de populoasche hoazelwormes. Buutn fazantn, zyn der oek nog aar bêestn (lik vossn en kattn) die hoazelwormes eetn.

Menschn zyn oek verantwôordelik voun 't feit dan hoazelwormes 't nie gemakkelik hen. Deur 't wegblenn van houtstoapels, hen ze ossan mo miender plekkn voun nunder wientersloape t'houn en voun goed te leevn tout court.

Ze zyn oundertusschn (lik olle inheemsche amfibieën en reptieln) beschermd.