De Ligurische Zêe (Italioans: Mar Ligure) es 'n zêe in Zuud-Europa, geleegn o de nôordwestkantn van't Itoalisch schiereyland, die dêel uutmakt van de Middellandsche Zêe. De zêe wierd begrensd deur Itoalië in't nôordn en ôostn, deur Vrankryk en Monaco in't nôordwestn, deur de Tyrreensche Zêe in't zuud'n en deur de reste van de Middellandsche Zêe in't westn. Mêer bepoald ligt ze tusschn de regioots Ligurië, Toscoane en d'eyland'n Corsica en Elba.

Liggienge van den Ligurischn Zêe
't Schee'n van den Ligurischn Zêe

't Mêest nôordelyke gedêelte van d'n Ligurischn Zêe noem'n ze de Golve van Genua, genoemd noar 't stee Genua, de grôotste oavnstad an die zêe. And're belangrykke plekken die an d'n Ligurischn Zêe liggn zyn San Remo, Imperia, Savona, La Spezia en (ofankelyk van d'interpretoasje) oltemets ôok Pisa en Livorno.

De nôordwestkust van de Ligurische Zêe es gekend vo z'n schôone landschappn en uutzichtn en zyn goe klimoat, vandoar da ze da gedêelte ôok d'Italioansche Rivièra noem'n. In de zêe moundn der teffrente riviern uut lyk d'Arno en de Magra.

De noame dervan komt van de Liguriërs, en Indo-Europees volk uut d'oudeyd da ôok ulder noame gaf an de regio Ligurië.

De Ligurische Zêe es ip zyn diepst 2800 mèiters diepe. 't Es eigntlyk moeilyk vo te zeggn oe grôot d'ippervlakte van d'n Ligurischn Zêe es, mè datter diskuusje es oover de precizze schreevn van de zêe. Volgest d'Internationoale Hydrogroafische Organizoasje komt de Ligurische Zêe overêen mè d'n denkbêeldign drie-oek tusschn Ventimiglia, 't nôordôostelykste punt van Corsica en La Spezia (zie de rôo lynne ip de koarte reksounder). Mo volgest d'Italioansche marinne es ze vele grodder en lôopt schee'n van Nice tout an't nôordwestn van Corsica en ton ezo were van't nôordôostn van Corsica oover Elba tout de plekke Piombino (zie de blowwe lynne ip de koarte reksounder).

Wikimedia Commons