't Olympia Zwembad was 't grotste zwembad van de regio Brugge (Sint-Andries). 't Lag eigentlik juste neffest 't Jan Breydelstadium, 't stadium van Cercle Brugge & Club Brugge.

De piscine aad acht boantjes mêe twêe compartementen ter grotte van 25 meters. Tesoamen aad 't dus e lengte van 50 meters. 't Was in feite azo da je ton êen gedilte aad wor dat de diepte 5 meters was, vo dedeze die boantjes wildn trekn en de deze die van de spriengplankn wildn spriengen. 't Ander compartement aad e maximum-diejpte van 1m40 en was dus in feite bedoeld vo de dêe die wildn plenzn en speeln. Ip wedstryddagen lieten ze ton de meur die tusschen de twi compartementen zaat, zakkn. 't Oendiepste gedilte lieten ze ton ook met e moteur nog e bitje zakkn zodat de zwemmrs gin ambetantigêedn oundervoenden as ze roundkêerdn.

't Zwembad was verder uutgerust mêe drie slierboanen en e ploeterbadje vo de klêne gastn. 't Zwembad aad spriengplanken toe 10 meters ôge.

't Olympiabad van langsbûtn

't Olympiabad aad de latstn tyd wel te kampen mêe betongrot. Dus zyn der stemmen ipgegoan om 't zwembad, da in feite toch wel z'n tyd êet get, met de ground gelyk te moaken en heleganschen erip te bouwn. Ip zundag 29 moarte 2015 was 't Olympiabad vo 't latst open. Neffest 't Olympiabad is ter vanof 2014 e nieuw zwembad gebouwd da 't oude vervangt. Den 30ste meie 2015 is 't nieuw zwembad, S&R Olympia, g'opend vo 't publiek.

In Brugge êe je nog twi andere, klindere zwembaden. Ip Kristus-Keunienk ê je 't Zwembad Jan Guilini; ip Sinte-Kruus êen ze 't Interbad.