Het Rockoxhuus is e vroeg zeventiend'-eeuws historisch pand in de Keizerstroate in Antwerpn. Nicolaas Rockox (1560 - 1640), burgemêester, humanist, mecenas en kunstverzameloare kocht het pand in 1603, os 't De Gouden Rinck heette, tegoare me 't huus der nevenst. Rockox liet de twi pandn toet een patriciërsuus verbouwn. Achter dat de latstn erfgenaam van Rockox dôod was, wierd de Vlamse renaissancegevel van zyn weunienge an 't begun van d'achttienste eeuwe vervangn dur een classicistische gevele. Een volgende grôote restauroatie gebeurde in 't twidde decennium van de twientigste eeuwe. Uut die periode datert een twidde galery in de binnenhof van 't huus.

Vlamse spreekwôordn van Pieter Brueghel de Joengn
Binnenhof van 't Rockoxhuus

De KBC-bank kocht het pand in 1970 en oender auspiciën van de bank wier gelyktydig de vzw Museum Nicolaas Rockox ipgericht, belast met de restauroatie en de surveillance van 't pand. Tusschen 1972 en 1977 wierd het gebouw ommegevormd toet en museum en polyvalente ruumten. 't Uus getuugt van de zeventiend' eeuwse culturele rykdom en uutstroalienge van Antwerpn.

't Rockoxhuus et byzoender meubilair (woroender kunstkabinettn, kistn en schôone gesculptirde kassn), kiramiek, bildhouwwerkn, wandtapytn en e grôote verzamelieng schilderien van oender andere Rubens, Antoon van Dyck, Jacob Jordaens, Joachim Patinir, David Teniers de Joengn, Joos de Momper, Frans Snyders, Jan Brueghel de Oegden en Pieter Bruegel de Joengn.

De binnenhof bewerkn

De binnenhof is een evocoatie van de vroeg zeventiend-eeuwse stadstuun die Rockox nor olle waarschynlikheid aad. Je bestelde plantn, heesters en boomptjies in Aix-en-Provence, by de botanicus en humanist Nicolas Claude Fabri de Peiresc (1580-1637). De zendienge is gedocumenteerd via begeleidnde briêfwisselienge die bewoard bleef. Een poar van die plantn gelik olyfboomn, oleanders, styraxn, een fluweelbôom en veel andere zyn nu wêer in dien hof te zien. Bist de lente zyn der tulpn te zien en in de zoamer versiern lelies den hof.

Den hof evoluerde toet e platse wo weetnschap, kunst en filosofie mekoar voendn. Rockox ad een ôop tuuntraktoatn en filosofische werkn van Justus Lipsius, wien da'tje persôonlik kende. Oak Abraham Ortelius, Christoffel Plantijn en Jan Moretus maktn dêel uut van zyn kennissekrieng. Peter Paul Rubens noemdege em zyn "vriendt ende patroon".

De vier deurn van den hof zyn beschilderd dur leerliengn van d'Artesis Hogeschoole in Antwerpn, trompe-l'oeils van in zeventiende-eeuwse stadshoovn, vorol voe d'illusie ip te roepn van een grôotn hof en 't perspectief te versterkn.

Externe link bewerkn