Sir Edwin Lutyens

Sir Edwin Landseer Lutyens (Londn, 29 moarte 1869 – Londn, 1 januoari 1944) wos een Iengelschen architect, volgens sommigte wel 'n grotsn van 'n 20sn êeuw.[1] En is in eigen land surtout bekend vou zyn ontwerpn van e masse administrative gebouwn in New Delhi, India.

Sir Edwin Landseer Lutyens in 1921

Lutyens studeerde vor architect an de South Kensington School of Art, van 1885 tout 1887. Achternoar lêerde 'n d'n stiel by Ernest George en Harold Ainsworth Peto. Ne begoest op zyn eign in 1888. In 1896, makte 'n em e project vor en uus van Gertrude Jekyll, e gerenommeerde tuunarchitecte. Ze giengn loater nog vele tôopewerkn an projectn.

Nog vo 't ende van den Êestn Weireldoorloge wierd Lutyens angesteld lyk êen van drie belangrykste architektn die deur de Imperial War Graves Commission ipgedroagn woarn van verschilligte gedenktêek'ns en ôorlogsmonumentn in't binn'n- en buutnland te bouwn, ounder and're in Ierland en Spanje. De mêest bekende doavan zyn de Cenotaph in Whitehall, Londn en 't Memorial to the Missing of the Somme in Thiepval in Vrankryk. Nen ontwierp ôok 140 Britse militaire begroafplekkn in België en Vrankryk.

In West-Vloandern ving je op d'Iengelsche kerkoovn uut 'n Êestn Weireldôorloge nog werk van Edwin Lutyens:

  • de Stone of Remembrance
  • de outn rustbankn

Lutyens wierd in 1918 tout ridder gesloagn; tsedert droeg 'm de titel sir. In 1921 wierd em verkoozn tout lid van de Royal Academy of Arts. Lutyens wos ôok verantwôordelyk vo't ountwerpn van New Delhi, woar da vanaf 1912 de regeerienge van Brits-Indië zetelde. Ne liet em, tegoare mè Herbert Baker, surtout inspireern deur de traditionêele Indische architecteur. D' impressionante residensje van de gouverneur, de Viceroy's House, die vandoage dienste doet lyk d'ambtsweunienge van de president van India en die nu de Rashtrapati Bhawan es enoemd, wierd ôok deur em ountworpn.

Bronn bewerkn

  1. www.nytimes.com , (...) Edwin Lutyens (1869-1944), often considered England's greatest 20th-century architect - URL bekeekn op 25/02/2008
  Mêer ofbeeldiengn die ier by passn ku je vien ip Edwin Lutyens ip Wikimedia Commons.