Wouter Vermeersch
Wouter Vermeersch (Kortryk, 8 november 1984) es nen West-Vlamschn Vlams-nationalistieschn polletieker van't Vlaams Belang. Dervôorn zat ie by Lijst Dedecker.
Biogroafie bewerkn
Vermeersch studeerdigde vo andelsingenieur an d'n unief van Antwerpn. Derachter wierd em commerçant in bedryvn die nulder specializeern in groen'n energie, lyk zunnepanêeln.[1]
In 2007 gienk tie by Lijst Dedecker, woar dat 'm êen van d'iprichters wierd en ôok de polletiek secretoaris van Joung Gezond Verstand, de joungernofdêelienge van de partye.[2] By de Vlamsche verkiezienge van 2009 stound ie ip de vierde plekke van de West-Vlamsche LDD-lyste, mo ne wierd nie verkoozn.
Achter dat 'n teffrente joarn niet'n mêe dee in de polletiek, begoest ie in 2017 te werkn lyk commerciël adviezeur vo de fraksje van Europa van Noasjes en Vry-ied, de fraksje in't Europees parlement woa da ôok Vlaams Belang by ôordigde.
By de gemêentelyke kiezienge van 2018 wostie lysttrekker van't Vlaams Belang in Kortryk en ne wierd verkoozn mè 2209 vôorkeurstemm'n. Sedert januoari 2019 zit ie in de Kortrykse gemêenteroad en estem doa fraksjeleyder van't Vlaams Belang. Ne wierd by de provincioale kiezienge van 2018 vanip de latste plekke mè 4574 vôorkeursstemm'n ôok verkoozn tout West-Vlams provinsjeroadslid, wa tie bleef tout in juni 2019.[3]
By de kieziengn van meie 2019 wos Vermeersch lysttrekker van de West-Vlamsche federoale VB-lyste en ne wierd verkoozn in de federoale Koamer mè 31.127 vôorkeurstemm'n.[4] In't parlement oud ie em surtout bezig mè de begrôotienge, ekonomie en asiel en migroasje.[5]
Ne ligt antinsn ne kêe in spel mè Vincent Van Quickenborne, d'n burgemêester van Kortryk. In de gemêenteroad ein ze teffrente kêe ol straffe diskusjes g'ed.
Referensjes bewerkn
- ↑ Interview Wouter Vermeersch, De Zondag, 16 juni 2019.
- ↑ LDD versterkt partijbestuur met nieuwe gezichten, LDD, 16 juli 2009.
- ↑ Wouter Vermeersch wordt fractieleider bij Vlaams Belang, Het Laatste Nieuws, 27 december 2018.
- ↑ Wouter Vermeersch trekt Kamerlijst Vlaams Belang in West-Vlaanderen, Het Laatste Nieuws, 12 januoari 2019.
- ↑ Fiche van Wouter Vermeersch ip de site van de Koamer