Burg (Brugge): verschil tussen versies

 

==Geschiedenisse==

[[843]] was e belangryk joar vor Europa. Deur ‘t [[Verdrag van Verdun]] wierd ’t Ryk van [[Karel den Grôotn]] verdêeld ounder z’n drie klêenkinders. [[Karel den Kletsn]] krêeg [[West-Francië]] ([[Frankryk]] en de [[Vloanderngouwe]]).

 

 

Round 944 liet groaf van Vloandern Arnulf I de [[Sint-Donaaskathedroale|Sint-Donaaskerke]] bouwn no ’t model van de Paltskapelle van [[Karel den Grôotn]] in Aakn. De kerke eet 'n belangryke rolle gespild in Brugge, mor is in 1800 ofgebrookn deur de Fransche en nie mir erbouwd.

 

’t Enigste dat er nog an erinnert zyn de groundvestn, ountdekt deur archeologische ipgroaviengn in 1955 en binst de groafwerkn vo den bouw van ‘t nieuw hotel in 1988. Z’en ôok ’n dêel van ‘t kôor van de kathedroale blôot geleid. De restantn van de kathedroale zyn g’integreerd in de kelderverdiepienge van ’t Crowne Plaza Burghotel en kunn groatis bezocht wordn.

 

De groavn lietn ôok nog e burchtkapelle bouwn, e gevang en e ghiseluus (woa dan ze menschn gegyzeld ieldn). ’t Gevang en ’t ghiseluus stoundn ip de plekke woa da nu ’t staduus stoat. Ze bouwdn ôok de Loove, ’t groafelik uus en loater ’t baljuwuus, ip de plekke van ’t oud gerechtsgebouw. ’t Oorsprounkelik outn uus van Boudewyn I wierd deur z’n ipvolgers vervangn deur e stêenn gebouw, da verschillige kêern verbouwd gewist is.

 

==D’Illig-Bloedbasiliek==

D’[[Illig-Bloedbasiliek]] is e dubbelkapelle me beneen de Romoansche Sint-Basiliuskapelle (1139-1149) en boovn d’Illig Bloedkapelle.

’t Is ‘t enigste gebouw dat overgebleevn is van den tyd dat de groafelikkn burcht ip ’t Burgpling stound. ’t Interieur van de dounkere crypte in de beneenkapelle is bewoard gebleevn en ‘t is e schôon vôorbeeld van de [[Romoanschn styl]]. ’t Is ’t oudste gebouw van Brugge. In de boovnkapelle van ’t Illig-Bloed, is ’t romoans karakter verloorn gegoan. In de 15ste eeuwe is ’t erbouwd gewist in gotischn styl en in de 19ste eeuwe is ‘t neo-gotisch verbouwd gewist. De relikwie van ’t [[Illig Bloed]] wordt doa bewoard en ieder joar meegedroagn in d'[[Illig-Bloedprocessie]]. De noame steeghere, [[Middelnederlands]] vo den trap no de boovnkapelle uut 1548, leeft voort deurdat de passage me winkeltjes no de wullestroate ''Ten Steeghere'' genoemd is.

 

==’t Staduus==

Links van de basiliek stoat ’t [[Gotiek|gotisch]] staduus. Den êestn stêen is geleid in 1376 deur groaf [[Lodewyk van Male]]. ’t Is êen van d’oudste staduuzn van de Nederlandn. In de vôorgevel uut de 14ste eeuwe stoan d'r 49 beeldn van figeurn uut den bybel en de geschiedenisse van Vloandern. Ip ‘t eeste verdiep ku je de Gotische zoale bezoekn. ‘t Outn anggewelf dateert uut 1402 en de neogotische meurschilderiengn uut den tyd van ’t istorisch romantisme, ende 19ste eeuwe. In d’istorische zoale zyn d'r schilderyen, documentn en zoakn die in verband te bringn zyn met de geschiedenisse van Brugge.

Neffest ’t staduus, ounder de boge, lopt ’t Blind-Ezelstratje no de reien. 't Stratje is genoemd nor ’n erberge van in den tyd.

In 2001 en ze vo de restauroatie van de gevel de ''Vlamsche Monumentnprys'' gekreegn, wa da te zien is ip e stêen an de zygevel in ’t stratje.

Links ku je ’t museum met de schouwe van ’t Brugse Vrye bezoekn. De schouwe, 'n ountwerp van [[Lanceloot Blondeel]] uut 1529-1531, gemakt in [[êke|êeknout]] met albast en marmer, is ‘n erinnerienge an d’overwinnienge van [[Karel V van et Illig Rôoms Ryk|Karel V]] ip de Franschn keunink Frans I, in de [[Slag by Pavia (1525)]].

 

==’t Oud Gerechtsof==