Paolo Bettini: verschil tussen versies

Zin grotste succesn ètn gekend in jindagskoersen. Int begun stondn in de schoaduwe van zinne ploegmoat, de specialist in klassiekers Michele Bartoli. Deur een poar blessures van dien Bartoli kost ie deurebreekn in 2000 deur Luik-Bastenoaken-Luik en een etappe in den Tour de France te winn. Tjoar doarachter ètn 't Kampioenschap van Zürich gewonn.

Sedert zin deurbroake was zin reloasje me Bartoli verslichterd. Achter da Bartoli weggink ut Mapei in 2002, kwam Bettini kopman. Dazelste joar ètn voor den twidde kji Luik-Bastenoaken-Luik gewonn. Je was wok den bestn in de Wèreldbeker.

Zin beste sizoen was zekerst 2003. Jèt ton Milaan-San Remo, de HEW Cyclassics en de Clasica San Sebastian gewonn. Ondertusn wastn wok kampioen van Itoalië gekomn. Onder andere deur die zeges atn veel UCI-puntn en wast ie voor den twidde kji den bestn in de Wèrelbeker.

In 2004 stond gjil zin sizoen int tjèkn van de wegrit ip de Olympische Spelen in Athene. Dedé ètn ton wok gewonn deur in de sprint de Portugees Sérgio Paulinho te klopn. Neffest dadde ètn voor den derde kji ip reke de Wèreldbeker gewonn.

2005 begost voor Bettini me een blessure int vworjoar, moar in de Ronde van Itoalië ètn een etappe kunn winn. Int noajoar ètn iederjin verboasd deur voor den twidde kji het Kampioenschap van Zürich te winn, een etappe te behoaln in de Ronde van Spanje en deur te winn in de Ronde van Lombardije.