Duuts militair kerkof Vlazêle

Op 't Duuts militair kerkof in Vlazjele leggen d'r 25.628 Duutsche soldoatn uut 'n Êesten Weireldôorlog.

Deze Duutsche grafstêen zien typerend, en zien d'r anders uut dan d'Iengelsche: ze leggen plat, ze zin griest en van granit, en zoender versierseltjes.

't Kerkof is oek bekend omdat er e kunstwerk stoat va Käthe Kollwitz. E Duutsche kunstenoaresse die e beeld makte voe neurn zeune Peter die gesneuveld is in 1914. 't Beeld noemt "Trauerndes Elternpaar", en 't ontroert lik gèn ander: je ziet d'r e voader en e moeder, die ieder apart, kapot goan van 't verdriet. E bètje vodder legt 't graf va Peter Kollwitz.