'''أحمد رامي ''', '''Ahmed Mohammed Rami''' ([[9 ogustus]] [[1892]] – [[4 juni]] [[1981]]) (ook geschreevn '''Ahmad Mohammed Rami''') was 'n [[Egypte|Egyptische]] dichtre. Y is best bekend vô ze dichtrlyke tekstn dietn geschreevn êt vô de fameuze Egyptische [[zanger]]s Umm Kulthum en Mohammed Abdel Wahab. Rami was ook e vertoaldre . Zyn bekende werkn omvatn vertoaliengn van verschillnde tonêelstikkn van [[William Shakespeare|Shakespeare]] en van de fameuze kwatrynn van de Perzische dichtre [[Omar Khayyám]]. Y wierd "Dichtre van 't Joenk Volk" genaamd omdatn zukke belangryke bydraagn geleevrd êt vô d’Araabsche zank en beschaavienge.
== Joenge joarn ==
Ahmed Rami wierd geboorn in Nasiriyya, e wyk van [[Caïro]], de [[9 ogustus|9sten ogustus]] [[1892]]. Zyn voadre lêerde tonne vô dokteur in Qasr al-’Ayni (Kastêel an de bronne) en wierd loatre paleis-dokteur. Ahmed brocht zyn êeste kiendrejoarn deur ip 't eiland Thasos (nu [[Grieknland]]), dat eigndom was van oundrekeunienk (of khedive) ’Abbas II. Y kwam weere in Cairo in [[1901]] en weunde doa by ze tante-moeie. Y gienk noa de laagre [[schoole]] Muhammadiyya en noa de befoamde middleboare schoole Khedive in Cairo. In die joarn bezocht Rami iedre weeke dichtrs-byêekomstn en begostn zyn dichtrs-kwaliteitn 't ountwikkln.
Y schrêef zyn êeste gedicht otn viftiene was en begost loatre in gedichtn zyn reaksje te geevn ip polletieke gebeurtnissn. In [[1910]] verschêen zyn êeste gedrukt gedicht in 't tydschrift Al-Rewaiat Al-Gadida.
Achtr datn zyn diplom gekreegn ad ip d' Oogeschoole vo Lêeroars (''Higher Teachers College'') in [[1914]], wierd Rami lêeroare vor eirdrykskunde en iengels in privoate schooln in Sayyida Zaynab en tonne in al-Qurabiyya en al-Munira. 't Was in dien tyd datn êest de befoamde dichters en artiestn van tonne lêerde kenn, lik Abdel Halim Al-Masri, Ahmed Shawqi, Ahmed Nassim en Hafez Ibrahim.
