De Barakken

De Barakken is een arbeiderswyk in de Belgische stad Mêenn, geleegn tussn de Leie en de Fransche grenze. De wyk ligt in tegenstellienge toe Mêenn-centrum ip de zudeliken oever van de riviere, en de bebowwienge vormt een geheel met dien van de Fransche stad Halewyne.

De Ryselstroate, d'hoofdstroate deur de wyk, is surtout de zundag vree druk, deur 't drukke wienkeltoerisme van Noord-Franschn die noa doa kommn.

Geschiedenisse

Ip 't gebied van De Barakken, dat bie anpassiengn van de grenzen in de 17sten en den 18sten eeuw bie Mêenn kwam, lag 't er vroegertyd e stik van de vestiengn va Vauban. Dedie woarn doar angeleid in de periode 1679-1689 in ipdracht van de Fransche keunienk Lodewyk XIV. Doabie was 't er e stikske van 't oede centrum van Halewyne geweunn verdween. Oender Lodewyk XV werd er in 1744 olwere e stik van 't hoornwerk ofgebrookn, en achter de Belgischen oenafhankelikheid werd 't gebied vodder oentmanteld. Vanaf olverwege de 19sten eeuw werdn de groendn verkocht.

In 't latste decennium van de 19sten eeuw werd er begonn met bow van wyk ip 't groendgebied. E poar nieuwe stroatn werdn angeleid, den eersten in 1891. Mêenn ad in dien tyd en groeiend antal iweuners, deur de grensarbeid in de Noord-Fransche industriesteedn, en de wyk werd vodder uutgebreid met nieuwe stroatn. Al in 1897 kreeg de wyk z'n eign parochje. In 1900 schoenk de stad Mêenn e stik groend an de Sint-Jozefsparochje voe de bow van e kerke, die de 26sten september 1904 werd ingewyd. Ip 't ende van da joar weunde der ol 4401 menschn in die nieuwe wyk.