Carolus Linnaeus

Carolus Linnaeus (in 't Zweeds Carl von Linné) (° Råshult by Stenbrohult in Zuud-Zweden, 23 meie 1707 - Uppsala, 10 januari 1778) was ne Zweedsen wetenschapper, meest bekend als bioloog, die de binomiale nomenclateure voor levende wezens invoerde.

In 1999 wier ter meerdere ere van Linneaus de Internationale Biologie Olympiade, kortweg IBO genaamd ingericht in Uppsala, onder leidinge van de twidden bekenden bioloog uut Uppsala, Andreas Ehn, specialist in de arachnologie.

In 2007 was 't 300 jaar geleen dat em geboorn wier, en wiern de verschillende tentoonstelling en erdenking gorganiseerd, onder meer in Harderwyk, Haarlem, Leiden en Amsterdam.

Levensloop

Linnaeus' vader was ne dominee die wilde dat zen zeune theologie zoe studeren. Uuteindelik deit em medecyn.

Beist zen studies mocht em de nateurlike schatten van Lapland beschryven. Achter zen reize in 1732 deur Lapland schreeft em zen Florula lapponica. In 1735 vertrokt em no [Nederland]] voe do voort te studeren. Ie promoveerde in de medecyn met als doctoraatsthesis Hypothesis nova de febrium intermittentium causa an den univ van Harderwyk. Derachter publiceerdet em zen Systema Naturae, messchien wel zen belangrikste werk waarin dat em zyn system beschryft voe de levende wezens in te deeln.

Ie et lange prof gewist in Uppsala. J'is begraven in de kathedrale van do.

Belang van Linneaus voe de wetenschap

Linnaeus' indelinge was gebaseerd voe de planten ip voortplantingsorgaan. In zynne tyd was da etwuk nieuws omdat er nog nie vele gesproken wier over voortplantingsorgaan by planten, en surtoe omdat spreken over voortplantinge em in de taboesfere bevond.

Linnaeus' publicatie Species Plantarum wordt gezien 't eerste groot werk over de binomiale nomenclateure van planten. In da boek beschreeft em al de ton gekende plantesoortn, en gaft nem z'allemolle een soortname. De genusname tope met de soortaandudinge was binaire name. Do nevest gaf Linnaeus ook de volledige name, dikkers ne hele regel, lik dat 't ton gebrukelik was. Linneaus' indelinge en naamstelsel wier al beist zen leven deur de meeste plantkundigen en zoölogen gebruukt. Ie klasseerde beist zen leven rond de 7000 soortn planten. Dat em ze klasseerde is nu nog dikkers te zien an de 'L.' van Linnaeus die achter de wetenschappelike name van vele planten staat.

Linnaeus beschreef niet allene planten maar ook mineralen en dieren. Alhoewel dat em de mensen al by de zoogdieren indeelde, en dus de mens nie meer als een alleenstaand wezen zag, wil da nie zeggen dat em brak met 't scheppingsverhaal uut de Bybel. Voe de evolutietheorie was 't nog wachten ip Charles Darwin een eeuwe later.

Linnaeuskloksje

Linnaeus naamde een plantje no zezelven: 't Linnaeuskloksje. 't Is een heel onipvallend en teer plantje. 't et twee klene blomtjes en e fyn stiengeltje. Linnaeus wordt dikkers afgebeeld met da plantje in zen an.